خطبة على الاطريقة الحمصية

البغ بوس ابو الخل
رنيم
عبدالله
عروس الشام

اييه يله طولو بالكم رح نكمللكم القصة

وانو الان مع الحلقة الثامنة

الحلقة الثامنة

وهيك يا جماعة خلص كتب الكتاب البراني وراحت الرجال ولازم بقى نشوف شو عمصير بخطبة النسوان والبلاوي ببيت ام عبدو
يلا معي على بيت ام عبدو نشوف كيف
بلشت هالنسوان تكفت كفت على بيت أم عبدو ( طبعا أغلبهم كان من بيت العروس ) ولسا ماكانوا جايين بيت
العريس لسا وامتلا الصالون عند بيت أم عبدو لأنو متل ما بتعرفوا ( الخطبة لأهل العروس ) يعني من لاقي
بالخطبة أهل العروس أكتر من أهل العريس...........
تأخرت الساعة وصارت عشرة ونص ولسا ما أجو بيت العريس وأم عبدو تدايقت من هالقصة
أم عبدو عم تحكي مع وحدة من النسوان بالعرس : شفتي لك يا خالتي لهلأ ما حدا شرّف منهون
المرا: أي والله يا خيتو ليش هيك تأخروا ؟ مافي بالعادي حدا يتأخر هيك
أم عبدو : اذا اجو بعد شوي إيمت بدا تطلع العالم من عندي ؟...الساعة 3 الصبح
المرا: أي والله ....شفتي انتي

وبهاللحظة بتوقف السيارت اللي جايبة النسوان أهل العريس قدام بيت أم عبدو ( بيت العروس يعني )
ونزلت هالنسوان وكل وحدة راسها منفوخ من فوق من تحت الشالات والايشاربات المحطوطة حط عالشعر بس
( لأنهن عاملين شعرهون عند الكوافيرات وخيفانين ما يخرب الموديل اذا حطوا الحجاب متل العادي)
وكل وحدة لابسي هالعباي السودة ( لأنو بالعادة بالخطبة بيلبسوا بدلات وطقومي مزلطة شوي )
ولا بسين كمان هالكعب العالي ( يعني أقل كعب 11 سم )
وفي ناس متل العادي جايبين معون كنادرون بالكيس مشان ما يتوسخوا عالطريق
والمكياج والزوقة على الوجوه أشكال وألوان( وشي حاطين من هادا اللي بيلمع )
( واللي حاطا العدسات ) واللي حاطا رموش اصطناعية )..........................وشو مناظر
وصاروا يسألوا: وين صار البيت أم فاروق؟
أم فاروق : هوني هادا ليكوه اللي عالقة لمباتو

وفي وحدة ختيارة جاي متأخرة عالخطبة هيي وبنتها وقعدت تدل الشوفير عالبيت والشوفير ماعاد يعرف من وين يروح
الختيارة : طلاع من هون خيو على ايدك الشمال
الشوفير: تكرمي يا حجي.
الختيارة :ايه الله يوفقك يا ابني ويحن عليك
الشوفير وهلأ من وين خالتي؟
الختيارة : استنى شوي خيو لحتى شوف وين صرنا............هلأ نحنا وين خيو؟
الشوفير: صرنا بالقصور يا حجي
الختيارة عم تحكي بنتها : وين قالتلك أم فاروق البيت؟؟
البنت : قالت بالشارع اللي قدام مدرسة طلائع النور تالت بناي عاليسار
الختيارة : خيو طلاع من عند طلائع النور على ايدك اليسار
الشوفير: فففففففففف استغفر الله العظيم ........................وهاي طلائع النور يا حجي
الختيارة : وين صار البيت وين صار البيت أريضة انشالله قاعدين بآخر ما عمّر الله ...........
خيو يحني عليك انزيل اسألنا وين بيت (أم عبدو ) اللي عندون خطبة اليوم
الشوفير: نعم خالتي....شو تفضلتي؟ نزلو انتو دوروا عالبيت ورايي طلب لبرات حمص الله يرضى عليكي والجماعة عم يستنوني
بنت الختيارة: خلص خيونزلنا هون...............أديش بتريد؟
الشوفير: 40 ليرة يا أختي
الختيارة: يه أريضة انشالله لشو ال 40 ورقة ؟
الشوفير : هلأ جايبتيني من بابا عمرو للقصور و40 ليرة كتير...؟؟؟(المسافة بيناتهم طويييلة بس فعلا اجار التكاسي عنا بحمص
اوووووووووه شغلة )
الختيارة : أي والله يا خيو عم ياخدوا 35 ورقة بس بالعادي
الشوفير: اختي 40 ليرة هادا اللي عندي ........يا ناوليني يا أما هلأ برجعك عبابا عمرو
الختيارة : يه قال يرجعنا قال.اعطيه بنتي اعطيه............قريضة انشالله شو الشغلي نهيبة؟
الشوفير: لا حول ولا قوة الا بالله ..............افففففففففففففف
ونزلوا الجماعة من التكسي واندلوا عالبيت ومشي الحال

واجتمعوا هالنسوان قدام بيت أم عبدو وفاتوا كلياتون ورنوا جرص الباب
ووقت انفتح الباب بلشت هالزلاغيط من على الدرج وهني فايتين على بيت العروس ووقفت أم فاروق بنص بيت
العروس هيي وخواتا وبناتا وبلشت تقول:
- أووووووووووها وحلت علينا البركي
أوووووووووها والسبع مباركات
أوووووووووها واليوم خطبة عروستنا
أوووووووها وكملت بوجودكن الفرحات
وليليليليليليليليليششششششششششش
ردت عليها أم عبدو وقالت :
- أووووووووووها يويا جماعة كلكون
أووووووووها وما نسينا فضلكون
أوووووووها واليوم عنا
أووووووووها وبكرة أنشالله عندكون
وليليليليليليليليليششششششششش
ردت أم أحمد أختا لأم فاروق:
- أووووووووووووها وأم العروس الله يعطيكي
أووووووووووها والسعادة بتواتيكي
أوووووووها وعقبال فرحتك بالكمالي
أووووووووووها ومنجي منكافيكي
وليليليليليليشششششششششششش
ردت عمتها للعروس :
-أووووها وفقسنا بيضة
أوووووووووها وطلعت بصفارين
أوووووووها وكل الناس بفرحة
أوووووووووووووها وفرحتنا فيكون بفرحتين
وليليليليليلييشششششششششش
وزلغطت هالنسوان ودخلوا على هالصالون وما في غير على لسان أم عبدو:
أهلين وسهلين يا ميت مرحبا تفضلي لهون عالصدر أم فاروق
أم فاروق : الله يزيد فضلك يا أم عبدو يا أم الفهم والزوق
وانفردوا هالنسوان بهالصالون وأخدوا راحتون
كانت بهالوقت سوزان عم تحط اللمسات الاخيرة لمكياجها بأوضة النوم هيي ورفقاتها وبنات عمها
سوزان : شو إجو ما هيك؟
رفيقة سوزان هدى: أي إجو شو مانك سمعاني كل هالزلاغيط
سوزان : يا ربي خيفانة ومستحية كتيرة
هدى: أي حاجتك عاد ,شو رح يا كلوكي............ليش هيك عرقتي
سوزان : والله ما بعرف ....شوبت ما بعرف ليش
هدى : استني شوي .........خدي هاي المروحة هوي فيها وخليها معك
سوزان : هلأ هيك بدي ضل عم هوي فيها قدام العالم
هدى : لك لأ يا جدبي بس وقت بتشوبي ....مشان ما تعرقي وينتزع مكياجك
سوزان :طيب هاتيها لشوف...............شو يالله ما خلصنا؟
هدى: أي خلصنا يالله قومي طلعي.
وهون بتفوت أم عبدو: ولكون شو صارفيكون ما خلصتوا؟
سوزان : يالله ماما خلصنا........اجينا
وطلعت أم عبدو هيي وبنتا (العروس سوزان ) وبنات عمها ورفقاتها وعدد من قرايبينا
وهني فايتين عالصالون قالت أم عبدو:
- أوووووووووها وحوطتك بياسين
أووووووها يا زهر البساتين
أوووووها ويا مصحف صغير
أوووووها وعلى روس السلاطين

وليليليليليلششششششششش

ردت أم فاروق من جوا :
- أووووووها واسم الله عليكي
أووووووووها وعين الله عليكي
أوووووووووها وعين الحاسد تبلا بالعمى
أوووووووووها واللي ما بيصلي عالنبي كمان

وليليليليليليليشششششششششششش

وفاتت سوزان وانصمدت على كرسي الستيل وهيي لساتا عم تهوي بالمروحة لأنها كتير شوبت

وبلشت هالعالم تطلع بهالعروس وتشؤلا من فوق لتحت ( عم نحكي على أهل العريس طبعا )
ليشوفوا ابنون مين بدو ياخد وشو نقتلوا أموا
وبلشت هالنسوان بعادتها اللي ما بتبطلها منوب وهيي الشلي والنقد والحكي والقر على هالعروس وأهاليها
وصارت هالأحاديث الجانبية بين الموجودين من النسوان:
الاولي: شفتي ولك ....حلوة هالعروس ما شبها شي
الثانية : قال حلوة قال.......شو حلاها ..........يحلي وبرا انشالله .......مانك شايفتيها زمكة
وطولها شبرين بعدين شوفي على هالعيون اللي الها..........صغار متل عيون الصراصير
ماشفتي خطيبة ابني ناهد ما أحلاها ؟ طول وهيبة وأكابرية وكل عين هالأد .........
هاي مدري شلون حاسستا هبياني هبياني
الأولى: لا يووووووو ما كل هالأد والله عيونا ما شبن شي بعدين ليكي هالخدود ما أحلاهن شلون موردين .....
انتي خطيبة ابنك خدودها سالتين وكراسي خدودا طالعة
الثانية: هلأ خطيبة ابني هيك؟ أي والله ما بتفهمي بالبنات ..........لا تشوفيها هيك ......
هادا كلو من المكياج والضراب السخن اللي بيحطوه على وجوهن

وكان في تنتين كمان عم يتوشوشوا :
الأولى: شفتي يا خيتو على هالعروس شلون شايفي حالا
الثانية : أي والله شايفي .......والله هالأم فاروق ما توفقت بهالعروس لابنا ...........مبين عليها قوية
الأولى: أي والله ........لا وشو......... شايلتي مروحة وعم تهوي فيها وحاطة إجر على إجر ........
الله يقرف عمرا

وكمان تنتين عم يتوشوشوا بين بعضون
الاولى : شفتي هالصالون ما أحلاه وطقم هالكنبايات مبين عليه تقيل
الثانية : أي والله والأم مبين عليها نضايفية كتير وأكابرية كتير
الاولى : شفتي أم كنعان شو ملبسي بنتا؟
الثانية : أي والله شفتي هالدلاقة الدم .......ملبستا الحفر والمزلط .......ما عيب عليها
الاولى : أي لكن يا خيتو بدا تمشيلا سوقا ......بركي حدا بيشوفا بهالخطبة وبيجي نصيبا
الثانية : ولا هديكي بنت أم فيصل شوفي الداير اللي لابستو شلون لفوق الركبة
الاولى : أي والله يا خيتو .......لا عاد حدا استحى وماعاد في عيب.....وإذا كنا هيك نسوان بين بعضنا.......
ما بيجوز من الله حرام
الثانية : أي والله ...........أديش الساعة معك؟
الاولى: الساعة 11............. ليش؟
الثانية : أي ايمت بدو يجي العريس ويلبس ويروح ؟

وبهالوقت شعلوا الصبايا هالمسجلة وبلش الرقص وقاموا هالبنات ليرقصوا ورقصوا سحر وبسمة أخواتو للعريس
بعدين قامت أختا للعريس هيي وبنت خالتا أم أحمد ورقصت
وبعدين قامت أم فاروق وأم عبدو وعملولن فتلة عالماشي وراحت أم فاروق لعند سوزان( العروس ) وقالتلا :
أومي عمليلك فتلة يا عروس ريتك ما تبلي انشالله
وقامت سوزان وهيي خجلانة ورقصت شوي وبعدين قعدت وصارت تهوي بالمروحة لأنها شو بت كتير

وهوي تهوي من هون والعالم اللي قاعدين (أهل العريس ) يتزاولوا منها من هون

نطت وحدة من بيت العريس وقالت: يييه عليكون انتو و هادا الشريط اللي حاطينو أي والله ملينا منو
خدي يا بنت حطيلنا هادا الشريط
وزتت هاي المرا الشريط لعند البنت الواقفة عند المسجلة وفتحت البنت المسجلة وحطت فيه الشريط وشغلتو
واذا
بيطلع شريط لعلي الديك
وقالتلا المرا: عليي الصوت شوي حبابي............
وقاموا بنات من بيت العريس يرقصوا على أغنية على الديك ( طل الصبح ولك علوش)
وبلش هالتصفيق والزلاغيط
وهون أم عبدو ( أم العروس ) فار الدم لراسا والجماعة وصارت تقول لحالا : يه يه يه يا سواد وجهي قدام هالعال
م شو هالغناي هاي..........يه الدم يصبِّغون على هالعملي

وبعد خمس دقايق قالت أم عبدو للبنت اللي واقفة عند المسجلة: شيلي خالي شيلي والله راسنا وجعنا

هون أم فاروق بتتدايق من هالحركة وبتقول لحالا : ييييي هلأ ماعاد تعجبها هالأغاني هالبنت الباشا؟...تنزل عليها النزلة انشالله

وصارت الساعة 12 واندق الباب وبيجي العريس فاروق أفندي
وفتحتلو الباب أختو سحر وراحت رجعت عالصالون وقالت : حطو عراسكون يا جماعة إجا العريس

وحطوا هالنسوان المقدرات حجاباتون على روسون وفي بنات ما حطوا على راسون وفي بنات حطوا الحجاب حط (يعني نص شعرون مبين )

المهم وقت اجا العريس قعدت هالعالم بمحلاتا وراحت أم العريس وأخواتو سحر وبسمة مشان يستقبلوه
ويفوتوه ( لأنو يا حرام بيكون كتير خجلان )
أم فاروق : أهلين أمي
فاروق : في نسوان كتير جوا؟
سحر: لا ما كتير شي 70 مرا
فاروق : ولي
أم فاروق : لك شبك أمي قول الله وفوت وقول السلام عليكم وقعود محلك جنب خطيبتك
فاروق : ماشي ...........يالله روحو لنشوف قولوا الله
وبلشت أم فاروق الزلاغيط من على الباب هيي وبناتا وصارت تقول:

أوووووها وصولوا على النبي
أوووووها وزيدوا صلاتوا
أوووووها ويلي بيشوف فاروق وما بيصلي عالنبي
أووووووووها ولشو حياتو

وليليليليليششششششش

أوووووها وفاروق يا واحد
أووووووها وسوزان يا تنين
أوووووها وخرزة زرقا
أوووووها ترد عنكن العين
وليليليليليلييشششششششششش

وفات هالعريس ووجهو أحمر متل الشوندرة وقال السلام عليكم
بس ما حدا رد عليه لأنو كان صوت المسجلة أعلى ويا حرام شو خجل لأنو ماحدا رد عليه السلام
وقامت سوزان واجت على باب الصالون واستقبلت عريسها
ووقت شافا فاروق فنجر عيونو وارتخى حنكو لأنو أول مرة بيشوف سوزان بدون حجاب وبكامل زينتها وطار عقلو
أمو واقفة جمبو وقالتلوا : شبك أمي شو أول بتشوفا
فاروق : بس حليانة كتير ولك يا أمي
أم فاروق : ييي تقبر قلبي هاي لأنو أول مرة بتشوفا بدون حجاب
ووصل فارق عنص الصالون محل ماقاعدة العروس وجمبا كرسي فاضي مشان يقعد العريس
وإجا العريس ليقعد وإّذ بتقلوا أمو : وين بدك تقعد أمي ما بدك تلبس خطيبتك علامتا؟
فاروق أد مانو متلبك نسي العلامة بالمرة وبعدين سوزان أخدتلو عقلوا فقام وطالع من جيبتو هالعلبة المخمل
الحمرا وفتحا وطالع منها العلامة
وهون بتجي أختو بسمة وبتقلوا : لحظة أخي استنى شوي
وبتركض بسمة عالمطبخ وبتجيب صينية وبتحط عليها مفرش مطرز وبترجع عالصالون وبتاخد الذهب من أخوها وبتحطوا عالصينية
وراحت دارت فيه عالنسوان وحدة وحدة مشان يشوفوا العريس شو جايب وشو بدو يلبس
( هاي العادة كانت موجودة قديما , ويمكن في ناس لهلأ ماشي على هالعادة )
ورجعت بسمة بالصينية وعطت الذهب لأخوها وبلش فاروق بدو يلبس سوزان وأول
شي لازم يلبسها ياه محبس الخطبة...................

ولسا ما خلصت الخطبة بس حاجتكن هيك مشان تلحقوا تقروا

يلا من متابعينك الفارس
ع بنتظر وبكل شوق الحلقة التاسعة
على الله ماتكون الحلقة الاخيرة بعد ال120 حلقة

ايه الله يسلم ايديك يالله لشوف هات اللي بعدوو تشجيع

أول شي الخاتم قلتلي إم
يللا لنشوف شو بدو يصير
صار عندي خطبة أختي وخطبة أخي بس التنين كانو بالصالة
يعني عم لاقي في شوية شغلات غير
يسلمن
متااابعة

شاعر الرومنسية

عروس الشام

رنيم

اشكركم على المرور وحسن المتابعة وهي الحلقة التاسعة

الحلقة التاسعة

اي ياجماعة وهلق رجعت لنشوف الجزء التني من حفلة الخطبة
ونشوف كيف رح يستلموا العريس ويخلوه يرقص
تابعوا معي
ولبس فاروق سوزان محبس الخطبة وعطاها محبس الخطبة تبعو ( اللي هوي من
الفضة طبعا لأنو الرجال حرام يلبسوا ذهب) ومسكت سوزان ايد فاروق
وهيي خجلانة ولبستوا المحبس بايدو اليمين
ورنت هالزلاغيط بكل الصالون
كان في ناس ما عجبون الوضع منوب واللي هيي أم عبدو (أم العروس)
أخدت أختا أم أحمد وفاتوا عالمطبخ ليحكوا

أم أحمد : ولك شبك أختي ليش هيك شاحطيني شحط عالمطبخ؟؟
أم عبدو : تنزل عليون النزلة انشالله
أم أحمد :منون هدول؟
أم عبدو : ما عرفتي مين ؟ بيت أبو فاروق
أم أحمد : يه ليش ولك أختي شو عملوا الجماعة؟
أم عبدو : شفتلي على هالعلامة اللي جايبينا؟
أم أحمد : عين الله عليها شبا ليش؟
أم عبدو : طلبنا 100 ألف حق علامة قلت لحالي بكرا بيجيبولن شي طقم
رولكس من هالتقال
ولا شي بعبي العين...........شو جنزير ومترين شو هاد؟؟
مين عاد لبس مترين بهالايام
أم أحمد : أي ولك أختي ماشي الحال عاد كلو ذهب...........
بكرا بتبقى بعدين قبل ما تتجوز بتنزل عالسوق بتبدلون بشي أحلى
أم عبدو : بس يا خوفي ما تطلع العلامة بمية ألف
أم أحمد : يه وشو بدك تعملي
أم عبدو :بركي بعد بكرا السبت بنزل عالسوق
وباخد هالعلامة معي وبسومها عند شي صايغ لأنو يمكن ما توصل لل 100 ألف
أم احمد : ايه خيتو عملي متل ما بدك ....بنتك وانتي حرة فيها

ورجعو التنتين عالصالون بس أ م عبدو كانت ضاربة
بوز غير شكل عم تنشتر أشكال وألوان وما عم تحكي مع حدا

وبعد ما لبس العريس العلامة قعدوا العروسين وقامت كام وحدة مشان يرقصوا
وبلش فاروق يحكي مع خطيبتو

فاروق: حلياني ولك يا ضرصاني
سوزان : هيهيهيئئ يحلي أيامك
فاروق :تسلملي هالضحكة يا رب
سوزان : الله يسلمك
فاروق: عجبوكي الدهبات؟
سوزان :بيجننو يسلموا ايديك
فاروق :أنا لو صحلي تقلك بكنوز الدنيا ما كنت بقصر
سوزان : عجبتك بدلتي؟
فاروق : بتاخد العقل رح تاكل منك شقفة
سوزان : عنجد؟
فاروق : أي والله.,.......

اجت وحدة من اللي عم يرقصوا وقالتلا لسوزان : يالله يا عروس قومي
وفرجينا رقصتك الحلوي
سوزان : عنجد خجلانة ....بلاها بلاها حبابة
فاروق: يالله قومي لشوف وفرجينا
سوزان قامت وهيي خجلانة ووجها محمر أشكال وألوان وحطولا
غناية هيفاء وهبي( رجب حوش صاحبك عني) وعلوا المسجلة عالآخر
وصارت هالعالم تصفق والعريس صار يسفق لعروستو
وصارت العالم تغني مع الغناي بس صاروا يقولوا بدال رجب حوش صاحبك عني
( فاروق حوش صاحبك عني )
وأجت أم فاروق وقومت فاروق مشان يرقص مع خطيبتو
وعينكون ما تشوفوا فاروق احمر وجهو وحرن وقال لأمو:
خلص أمي ما بدي قوم وين بدك تقوميني قدام كل هالنسوان لأرقص؟؟؟
أم فاروق: لك أي أوم ولك أمي ما حلوة مشان خطيبتك
وهون سوزان بتجي بتشدوا لفاروق وبتخليه يقوم ويوقف جمبها
وهون فاروق احمر واصفر واخضر وهالنسوان صارت تضحك من جوات قلبها
ووقف فاروق وصار يصفق بس وما حاول يرقص منوب وسوزان صارت ترقص
جمبو

وخلصوا من الرقص وأجت أم عبدو وقالت: يالله تفضلوا عالسفرة يا عرايس
( طبعا وهيي لساتا مبوزمة )
ودخل فاروق وسوزان عالسفرة العمرانة لحالون قبل ما تفوت العالم وقطعوا قالب
الكاتو
وحط كل واحد قطعة بصحنو وبلشوا يطعموا بعضون
فاروق :افتحي تمك لشوف.........هممممممممم
سوزان : انت كمان فتاح تمك.........هيهيهيهئئ
وبتروح سوزان بتحط كام كباي وبتجي بتقول لفاروق: دوق هدول الكبايات
هدول شوغل ايدي
فاروق: ممممممم ياسلام شو هالكُبة هاي ....يسلموا ايديكي فعلا شي طيب

وخلصوا العروسن من السفرة وطلعوا عالصالون وفاتت هالنسوان
عالسفرة وبلش السفق وطرق الصحون من هون و من هون ودارت الاحاديث
التالية بين النسوان

الاولى: ليش هيك هالتبولة مافيها حامض ولي على قامتون انشالله
الثانية : أي والله وليكي هالكُبة مافيها حشوة منوب لشو هالكحتني هاي تنزل
عليهون النزلي
الاولى: ولا شفتي هاليالنجي الرز تبعا مانو مستوي وعم يقرط
الثانية :أي شفتي ولا ليكي شأد جايبين قراص صفيحة مضفورة........
تقولي جايبين عالعدد ...أي يكتروهون شوي
الاولى: يا خيتو مبين عليها هالأم عبدو ما بتفهم منوب

وأكلت هالنسوان وشبعت وتملت ولبسوا وقالوا خاطركون وألف مبروك انشالله

وهيك يا جماعة خلصت حفلة الخطبة اللي طالت كتير

ورح نرجع نكفي قصة هالخطبة وشو بيصير أثناء فترة الخطوبة والتحضير للجهاز

استنوني بالحلقة الجاي

فارس شو القصة ؟؟؟؟ صار مسلسل مكسيكي وشوي وبيصير تركي خخخخخخخخخ

اسماع اذا الخطبة هيك .. كيف العرس؟؟؟؟

بس حلووووووووووي يسلمو ^_^

venus كتب:: فارس شو القصة ؟؟؟؟ صار مسلسل مكسيكي وشوي وبيصير تركي خخخخخخخخخ

اسماع اذا الخطبة هيك .. كيف العرس؟؟؟؟

بس حلووووووووووي يسلمو ^_^

ههههههههههههههههههههههه

ييييي العرس لو احكيلك على العرس

بس لا تقنعيني حلوة القصة موهيك

ايه حلوه بتجنن بس يالله هات الباقي عم نستنى عراضة

عروس الشام كتب:: ايه حلوه بتجنن بس يالله هات الباقي عم نستنى

تكرم عينك عروستنا

مارح خليكي تستني
يله

الحلقة العاشرة

وهيك يا جماعة الخير تمت الخطبة على خير وسلام والحمد لله وانكتب
الكتاب
وصارت سوزان من نصيب فاروق
وبعد الخطبة لازم العريس يصير يشوف خطيبتو على طول ويحكي معها عالتلفون
على طول مشان يتعرفوا منيح على بعض ويدرسوا أخلاق بعض وينبسطوا
شوي بفترة هالخطبة قبل ما يجي العرس
لأنو متل ما بتعرفوا مرحلة الخطبة هيي أحلى وأجمل مرحلة بالحياة

وبيوم من ذات الايام بعد الخطبة بشي جمعة زمان قرر فاروق أنو يطلع هوي
وخطيبتو سوزان مشوار
ويتفتلوا سوا متل ما بيعملوا كل العرسان بالعادة

بس كان في مشكلة

وهيي أم العروس ( أم عبدو ) اللي يمكن ما تخلي بنتا سوزان تطلع هيي
وخطيبها لحالهون

شوفو شلون صارت القصة:

اتصل فاروق ببيت حماه مشان يتفق هوي وسوزان على الطلعة فبترد عليه
مرت عمو أم عبدو ( كالعادة )
فاروق : ألو مرحبا
أم عبدو : مرحبتين ...أهلين فاروق
فاروق : شلونك مرت عمو
أم عبدو :لايئة الحمد لله
فاروق : وشلونو عمي وهالشباب والصبايا
أم عبدو : كلن بخير
فاروق: أي الحمد لله,...............سوزان هون مرت
عمو
أم عبدو : أي هون ....عم تدرس والله بئوضتها .........
عيطلك إلا ؟؟
فاروق : أي من بعد إذنك
أم عبدو : أي تكرم عينك ................ياا سوزاااان
..................ولك يا سوزاااااااااااااااان
سوزان بترد من جوا : نعم ماما
أم عبدو : ونعامي انشالله مانك سمعاني؟
سوزان : شوفي ليش؟
أم عبدو :تعي احكي مع خطيبك فاروق
سوزان بنط قلبها من محلو وبتركض حفياني وبتنسى تلبس شحاطتها وبتخطف
السماعة من ايد أمها
أم عبدو : لا تطولي كتير متل مبارح ..............
بدي أحكي مع خالتك أم أحمد عالتلفون
سوزان :أي ماما خلص ما بطول
أم عبدو : لنشوف
سوزان :ألو
فاروق : مرحبا سوسو
سوزان :أهلين فوفو
فاروق : كيفك يا عمري
سوزان : مشتاقتلك
فاروق: تشتقلك العافي يا رب
سوزان :أنت كيفك .؟
فاروق : أنا وقت بسمع هالصوت الحلو بصير بألف خير
سوزان : عنجد عم تحكي؟
فاروق : لكن شو
سوزان : صدقتك والله
فاروق : والله عم احكي جد..........
طيب شو بدك اعملك مشان تصدقي؟
سوزان : ولا شي خلص صدقتك
فاروق : شو صار معك؟
سوزان :بشو؟
فاروق : بالمشوار اللي قلتلك عنو مبارح
سوزان : يا ربي وبركي الماما ما وافقت؟
فاروق : ليش لهلأ ما قلتيلا؟
سوزان :لا لسا......................
طيب بركي قالتلي بدي روح معكون؟
فاروق : لا شو تروح معنا يستر عرضك ............
ما بيكفي وقت بجي لعندكون بتقعدلي متل سنجق عرض وما منعرف نحكيلنا كام
كلمة علي بعضون أنا وياكي
سوزان : شو بدي اعمل طيب؟
فاروق : دبريها بمعرفتك
سوزان : طيب اتركني أنا اتصرف وبحكي معك أنا وقت باخد الموافقة
فاروق : ماشي ........بس لا تتأخري ؟ عم استناكي على نار ها
سوزان : يا لطيف شو مستعجل ههيهيهيهئ .............
خلص بهاليومين بخبرك شو بصير معي
فاروق : ماشي...........بدك شي حياتي؟
سوزان :الله معك .........مع السلامة
فاروق : الله يسلمك

وتاني يوم وسوزان قاعدة هيي وأمها بالسهرة عم يقمعو البامي فبتقول سوزان:
ماما
أم عبدو : شبك
سوزان : ما بدك تعزلي المطبخ ؟ كتير صاير وسخ هالكام يوم
أم عبدو : لا ما بدو شي عين الله عليه لسا هديك الجمعة عزلناه بعد ما صارت
خطبتك
سوزان : طيب شو رأيك بكرا استعير السيبا من عند الجيران وليفلك التريات
ليكي شلون متوسخين وسماكة الغبرة عليهون هالأد
أم عبدو : أنتي شو قصتك اليوم من وين أجتك هالمروة هاي ؟........
....هيك من الله
سوزان : لا ماما عنجد عم شوفك كتير عم تتعبي وبدي ساعدك بشغل البيت
مزبوط وشيل عنك كتف
أم عبدو : ايه عملي متل ما بدك
سوزان : طيب بكرا ببلش

وهيك تاني يوم بعد العصر استعارت سوزان السيبا من عند الجيران و طلعت
عالتريات وليفتون ومسحتون بلورة بلورة ولمبة لمبة وقطعة قطعة لحتى صاروا
يبرئو برئ
بعدين راحت مسحت الارض وشطفت البرندات ونفضت الغبرة وغسلت المواعين
اللي بالمجلى هيك لحتى هلكت يا خطي
وأم عبدو قاعدة عم تتفرج عليها وبدها تعرف شو سر هالنخوة والهمة القوية
اللي نازلي على بنتها هيك فرد مرة

ولما خلصت سوزان أجت وقعدت جنب أمها وقالت: ماما
أم عبدو : نعم
سوزان : بدي قلك شغلة
أم عبدو : قولي
سوزان : خطيبي فاروق
أم عبدو : شبو بدر الدجى؟
سوزان : عازمني بكرا على مشوار
أم عبدو : شوووووووووو......اي عال والله هادا اللي كان ناقص
سوزان : يا ربي .......وشوفيها يعني ......ما خطيبي يالله؟؟
أم عبدو : خلص بدو يشوفك بيجي لهون وبيشوفك لشو الطلعة برات البيت
سوزان : حبابي ماما الله يخليك والله ساعة بس ما منطول
أم عبدو : مافي .............لك انتي مجنوني؟؟
.........شو بدون يحكوا علينا العالم ؟
سوزان : شو بدن يحكوا يعني ؟خطيبي هادا وفي كتب كتاب براني صاير
بيناتنا
أم عبدو :شووو...وصايرة عم تعرفي تحكي كمان
سوزان : ماما حبابي الله يوفقك يا رب هوي هالمشوار بس
أم عبدو: طيب لوين بدو ياخدك ؟
سوزان : بدو يا خدني مشوار بالسرفيس تبعو.........
هيك يعني شمة هوا
أم عبدو : وبركي ماهان على أبوكي ؟
سوزان : هلأ بس يجي بسألوا
أم عبد و : اصطفلي أذا ابوكي عطاكي إذن فروحي أنا ما دخلني
ونطت سوزان وباست أمها بوسة كبيرة
وبيجي أبو عبدو بالليل وبتركض سوزان بتبوسو وهوي فايت من الباب وبتاخد
منو الاغراض وبتفوتون عالمطبخ

وبالسهرة وهني عم يتفرجوا عالتلفزيون بتقلوا: بابا
أبو عبدو : نعم بابا
سوزان : بدي آخد إذنك بشغلة
أبو عبدو :شو هيي بابا
سوزان : فاروق بكرا بدو يا خدني مشوار
أبو عبدو سكت شوي بعدين قال: لوين بدو يا خدك؟
سوزان : هيك مشوار بالسرفيس تبعو هون بالبلد يعني بالدبلان وبشارع الغوطة
وعطريق الوعر يعني هيك تفتيلة بس
أبو عبدو : ماشي بابا روحي بس لا تطولي ساعة زمن بس
سوزان : لا بابا ما بطول......الله يخليلنا ياك يارب

وبتركض سوزان على أوضتها وبتتصل بفاروق

سوزان : الو فاروق
فاروق: أهلين سوسو ......شو طمنيني شو صار معك؟
سوزان :مشي الحال
فاروق : يعني بكرا منروح انشالله
سوزان : أي
فاروق : يقبرني ربك .......خلص بكرا جهزي حالك الساعة 5 المساء
بمر باخدك
سوزان :وأنا عم استناك......يالله لازم سكر بدي روح نام
فاروق : وين لسا ماحكينا مع بعض
سوزان : والله هلكاني اليوم من شغل البيت وتعباني كتير
فاروق : خلص سوسو روحي ارتاحي وبكرا موعدنا انشالله
سوزان : أكيد
فاروق : ما بدك تقوليلي شي قبل ما تسكري؟
سوزان : ممممممممم شو بدي قلك ؟
فاروق : تذكري
سوزان :مممممممم أي عجزت
فاروق : ما بدك تقولي شي لخطيبك فاروق؟
سوزان : يالله منك والله بستحي من هالشغلات
فاروق : طيب خلص سمعيني ياها بس هالمرة
سوزان : ما بقدر ماعم تطلع معي
فاروق : طيب أنا رح شجعك.........أنا بحبك
..............يالله قوليها
سوزان ...مممممممم........ااااااااااا...
ببببب............بحبك
فاروق : تئبشي قلبي انشالله..........يالله سلام
سوزان : الله معك

وسكرت سوزان السماعة وتنهدت تنهيدة كبيرة وراحت نامت وهيي عم تحلم
بالمشوار بكرا مع خطيبها فاروق

وبكرا منشوف شو صار مع هالخطيبين الظريفين بهالمشوار.....
واما شو مشوار خيييييييلة
استنوني بكرا لتشوفوا احلى مشوااااااااااااااار

يييييييييييييييييييييييي اي يالله بئا شو بدنا نضل عم نستنى
منتظرين فارس

بالإنتظار فارسنا والله عم تشوقنا

عروس الشام كتب:: يييييييييييييييييييييييي اي يالله بئا شو بدنا نضل عم نستنى
منتظرين فارس

روق علي شوي

رح كمل

رنيم كتب:: بالإنتظار فارسنا والله عم تشوقنا

على عيني يا احلى زهرة بالمنتدى

الحلقة الحادية عشرة

سووووووووووووري اني تاخرت عليكم بس شو يحكي الواحد
امتحانات وبلاوي مصبرة ادعولي يتجماعة
ومنرجع هلأ عالمشوار اللي بعد مشقة اتفقوا عليه سوزان وفاروق

وأجا بكرا وجهزت سوزان حالها ولبست أحلى تياب عندها عليها وتحمرت وتزوقت وحطت هالبياض السليماني
والكحلة والمسكارة وطلعت وقفت عالبرندة وهيي عم تستنى خطيبها فاروق

وبهالوقت فاروق كان عم يلبس تيابو فلبس أحلى تياب عندو هوي التاني
ودلق على حالو قنينة البارفان بس بعدين حس انو ريحتها غريبة وإذ بتطلع قنينة الكولونيا تبع الحلاقة فبيقول لحالوا:
لعما ..........هاي قنينة الكولونيا تبع الحلاقة........اي يا الله كلو عند العرب صابون

ونزل من البيت وركب بالسرفيس تبعو وشد لعند الحلاق وفات لعند الحلاق وصار هالحوار:
فاروق : سلاااام عليكم
الحلاق والموجودين : وعليكم السلاااااااااااام أهلين فاروق
فاروق : الله ريتو نعيمن يا شباب
الموجودين :الله ينعم عليك
فاروق : خيو أبو زهير بدي منك تقصلي شعري قصة غير شكل وبعدا بدي ياك تعملي سيشوار مرتب
الحلاق : أي تكرم عيونك...............شو الظاهر عندك موعد اليوم؟
فاروق : أي والله يا اب زهير..................بيني وبينك اليوم عازم خطيبتي على مشوار
الحلاق: أي تتهنى يا سيدي ...........ووين بدكون تروحوا؟
فاروق : والله ما بعرف ..........بدنا نتفتلنا شوي بهالدبلان وبشارع الغوطة وعلى طريق الوعر
وشارع الخراب
الحلاق : هيك بدكن تقضوها على تفتيل؟؟؟خدا وقعود انتي وياها بشي مطرح وحكولكن كلمتين
فاروق : أي لوين بدي روح أنا وياها ؟ مافي محل بحمص متل الخلق والعالم ينراحلو
الحلاق : تعا لدلك على محل فاتح جديد وعم يقولوا عليه شي خيلة كتير
فاروق: شو اسمو؟
الحلاق: يا سيدي اسمو أجنبي ,,,,,,,,,,,,ووولا محمد شو أسمو هادا المحل اللي عم تروح عليه
انتي ورفقاتك؟
صبي الحلاق محمد : اسمو السبورت كافيه
الحلاق : ايوا .....اسمو السوبر كافيه
فاروق : ووين صاير هادا السبرت كافيه؟
الحلاق : على طريق طرابس عند اشارة فندق السفير
فاروق : وشلون وضعو هالمحل؟؟
الحلاق : شي أوبهة تمام .........على كيفك يعني .........وخرج عشاق وناس خاطبين
شرواك
فاروق : خلص لكن رح نروح ونجرب
الحلاق: خير انشالله...................نعيما فاروق أفندي
فاروق : الله ينعم عليك
وطار فاروق وركب بالسرفيس وطيران على بيت حماه أم عبدو مشان ياخد سوزان عالمشوار

ووقت كانت سوزان عم تستنى فاروق عالبرندة بتطلع أمها وبتوقف معها وصار هالحوار:
أم عبدو : شو لسا ما شرّف الافندي
سوزان : لا لسا
أم عبدو: ديري بالك ولك بنتي
سوزان : من شو؟
أم عبدو : بني آدم يعني بركي قلك تعي نروح لهون ولا لهون ...........أوعك ها بقرف عمرك
سوزان : لا بس بدنا نعمل تفتيلة بالسرفيس وبس
أم عبدو : أنا عم وعيكي يا جدبي لا يقوم يضحك عليكي............بركي قلك تعي نروح لعنا
عالبيت مشان تشوفي أمو ......أوعك ها
سوزان :ليش؟
أم عبدو : بركي ماكان في حدا بالبيت ويستفرد فيكي يا دلاقة الشفّة
سوزان : خلص ماما لا تخافي ولا يهمك
أم عبدو : ايه ...............لنشوف

وهون بيجي فاروق وهوي عم يزمر من بعيد

وسوزان بتشوفو من فوق وبتعملو بايييييييييييييي
سوزان : بدك شي ماما؟؟
أم عبدو :متل ما فهمتك ها........ديري بالك ها............ولا تتأخري كتير
سوزان :لا ما بتأخر ..... خاطرك ماما

ونزلت سوزان وركبت جنب فاروق ووقت شافها قلها
فاروق : لك أهلين ........يا ويلااااااااااااااه شو هالريحة الي حاططتيها ؟ريحتا كتير حلوة
سوزان : وانت كمان شو هالتياب الحلوين وريحة عطرك كتير مميزة
((صارت ريحة كولونيا الحلاقة مميزة؟؟؟ ههههه ياحرام انعما ع قلبها))
فاروق : تسلميلي يا رب....................لوين بتحبي نروح؟
سوزان : وين ما بدك

وسحب فاروق بهالسرفيس من القصور وقطع طريق حماه وطلع عالكورنيش (هاي مشان تتعرفوا على شوارع
ومناطق حمص العتيدة)
وهوي ماشي شغل المسجلة وحطلا لسوزان شريط لنجوى كرم مشان تروق آخر رواق
ونزلو بعدين من أشارة مدينة الملاهي عالكورنيش يسارا باتجاه الساعة الجديدة وبعديا أخدو يمينون وفاتوا بالدبلان
وسوزان مبسوطة وطاير عقلها هيي وفاروق
وقال فاروق: تاكلي بوظة؟
سوزان : أي مناكل
فاروق : لك تكرم عيونك يا عيوني
ووقف فاروق عند الرينبو ونزل اشترا كاستين بوظة أم العشرة
ورجع طلع بالسرفيس ومشيو على مهلون
وفاتوا بشارع الغوطة ووصلوا على دوار الكاردينيا وراحو عاليسار باتجاه الحمرا
وأخد فاروق طريقو باتجاه السبورت كافيه
فاروق: سوزانو
سوزان : نعم
فاروق : شو رأيك نقعدلنا بشي محل هيك حلو ونتساير ونحكي
سوزان : لا ما بتخليني الماما...............
قصدي بخاف لا نتأخر وعدت الماما ما أتأخر كتير
فاروق : لا ولا يهمك ما منتأخر
سوزان :طيب وين بدنا نروح
فاروق: في كافيتيريا كتير حلوة أسمه السبيرت كافيه هون لقدام شوي
سوزان :ايه بعرفا..........حكولي رفقاتي بالمدرسة عليها
فاروق : خلص رح نروح لكن
ووصلوا هالعريسين عالسبورت كافيه وصف فاروق هالسرفيس ودخلوا عالكافيتيريا
وقعدوا
وبعد شو بيجي الكرسون
الكرسون : أهلا وسهلا
فاروق : أهلين فيك خيو
الكرسون : شو بتحبوا تطلبوا
فاروق : شوفي عندكون؟
بيروح الكرسون بجيب المينو وبيجي بيعطيها لفاروق
فاروق صار يقلب بهالمينو ومافهم عليها لأنها كانت بالاجنبي
وعطاها لسوزان وقلها : شوفي شو بدك تطلبي
وقال فاروق للكرسون : جبلي فنجان قهوة اذا سمحت
الكرسون : تكرم والمدام شو بتحب تطلب
فاروق : آنسة أذا سمحت ............نحنا مخطوبين ولسا ما تجوزنا
الكرسون: انشالله ألف مبروك
سوزان بما أنها بتعرف انكليزي فقررت تطلب كابوتشينو فقالت:
سوزان : أنا بدي كابوتشينو فاروق
فاروق : خلص جبها كابوشتينو
صار الكرسون يبتسم لأنو فاروق ما قال كابوتشينو صح
وبنفس الوقت ابتسمت سوزان وقت سمعت فاروق عم يقول عن الكابوتشينو ( كابوشتينو )
فاروق اشتلق انو الكرسون وسوزان عم يبتسموا فشو قال لحالوا : يخرب بيتو عم يلطشلي خطيبتي
فقام وقف وقلو للكرسون : ليش عم تبتسملا ولا
الكرسون : عفوا أستاذ أنا ما ابتسمتلها ولا شي
فاروق : كذاب شفتك بعيني وعم تكذب كمان........سوزان : روحي واقعدي بالسيارة لاحقك
سوزان انقطع قلبها واصفرت وصارت متل الليمونة وركدت وفتحت باب السرفيس وعدت جوا وسكرت الباب
وصارت تتناوء من الشباك
فاروق كلمة منو و كلمة من الكرسون علقت بيناتون وبلش ضرب البكوس ولطش الكفوف وشلف الصحون
والكراسي
وقامت هالعالم وفكتون وطلع فاروق من الكافيتيريا وهوي عم يسبب أشكال وألوان
وسوزان قاعدة بالسرفيس وعم تقتل بحالا
وطلع فاروق بالسرفيس ووجهو ما بيتفسر
سوزان : شو صار ليش هيك وجهك وشو عملتلو للزلمي؟
فاروق : كنت بدي ادبحو واشرب من دمو...............شو قلك هالحقير وقت صار يتبسم؟
سوزان : الله وكيلك ماقال شي بس أنا كنت عم ابتسم وقت قلتلو عالطلب...........
ما بعرف ليش هوي اتبسم
فاروق: هيك لكن
سوزان : الله وكيلك هادا اللي صار
(( سوزان ما حكت لفاروق ليش ابتسموا هيي والكرسون مشان ما تجرحوا لفاروق ))
فاروق : لك سوزان أنا بغار عليكي من الهوا
سوزان : عنجد؟؟ هلأ كل هادا اللي عملتو لأنك بتغار عليي
فاروق : لك أنا مستعد موت حالي مشانك
سوزان : هلأ طيب شو صار مشي الحال
فاروق: أي مشي الحال واعتذر بس بعد ما أكل اللي فيه النصيب
سوزان : أي الحمد لله خلينا هلأ نروح من هون والله كرهتو لهالمحل خلينا تقعد شو بجنينة الدبلان أحلى
فاروق :أي والله

وراحو فاروق وسوزان وكملوا مشوارن بجنينة الدبلان عند البطات

وانتهى هالمشوار المشحر على خير

شو رايكن بهاالمشوار
حلو ما؟؟؟؟؟؟؟؟؟؟

وليييييي على هيك مشوار

لك يا حرام على هالمشوار طبعا كلو من ورا راس هالفاروق قال عم يعمل فيها رجال
يالله فارس هات اللي بعدووو

اقتباس :: أي لوين بدي روح أنا وياها ؟ مافي محل بحمص متل الخلق والعالم ينراحلو

هي القصة من عهد جد جدي
تعوا شوفوا حمص شوفيها أما كن
السبورت ما بقى يبين
سدقني بتحتار وين بدك تقعد
كانو يسألوني الله يسامحون

يسلم إيديك يا إلهي إذا هيك الغيرة بتساوي

رنيم كتب:

اقتباس :: أي لوين بدي روح أنا وياها ؟ مافي محل بحمص متل الخلق والعالم ينراحلو

هي القصة من عهد جد جدي
تعوا شوفوا حمص شوفيها أما كن
السبورت ما بقى يبين
سدقني بتحتار وين بدك تقعد
كانو يسألوني الله يسامحون

يسلم إيديك يا إلهي إذا هيك الغيرة بتساوي

ما صار شي انا نازل على حمص بالصيف
ورح شوف وين حدليني على مكان حلو نجلس فيه

الله يسلمك اي وبتساوي اكتر من هيك كمان

مشكورة رنيم يا عطر هذا المنتدى

شاعر الرومانسيه كتب:: وليييييي على هيك مشوار

ههههههههههههههههههههههههههههه

عروس الشام كتب:: لك يا حرام على هالمشوار طبعا كلو من ورا راس هالفاروق قال عم يعمل فيها رجال
يالله فارس هات اللي بعدووو

لكان رجال هل فاروق

طولو بالكم

هي الحلقة رح تتأخر شوي

الحلقة الثانية عشرة

وبعد هالمشوار الوحيد والمشحر والظاهر انهن ما طلعوا غيره هالمساكين خلصنا بقى من المشاوير وصار بدنا نبلش بالجهاز
وبعد الشهرين
قرب الجهاز
وأم عبدو بهالشهرين زمان ما هديت من التخفيق بالسواق هيي وبنتها سوزان
طبعا بدها الجهاز يكون بعبي العين وببيض الوجه قدام بيت أحما بنتها ومناها تقلعلها عينا لأم فاروق بالجهاز اللي بدها
تطالعو لبنتها
عنا بحمص ( وبمعظم المناطق السورية ) الجهاز بيتألف من كل ما تحتاجه العروس من مستلزمات لبيتها من
لباس وأدوات مطبخ وفرش ومتفرقات عديدة
ودرجت العادة أنو أهل العروس هني اللي بيجهزوا بنتهم وأحيانا أهل العريس هني اللي بيقوموا بهالشي
وفي ناس ( أهل العروس ) بياخدو مصاري من بيت العريس مشان الجهاز ( يعني بتصير الشغلة مشتركة
بين أهل العروس وأهل العريس )
وبقصتنا هاي أم العروس هيي اللي بدها تجهز بدون ماتاخد مصاري ( حسب شور الأب أبو عبدو )
وكملت أم عبدو الجهاز تقريبا وصار لا بد من تحديد موعد الجهاز والعرس

واتصلت أم فاروق بأم عبدو مشان تستفهم منها بخصوص الجهاز ودار بيناتون الحديث التالي:

أم فاروق : مرحبا
أم عبدو : أهلين وسهلين أم فاروق
أم فاروق : شلونك أم عبدو وشلونو أبو عبدو وعبدو وهالصبايا
أم عبدو : كلن بخير بيدعوا بسلامتك
ام فاروق : الله يسلمك ويحفظك........... وشلونا عروستنا الحلوة سوزان؟
ام عبدو : لايئة والله
أم فاروق: هالمنظومة ليش ما بتتصل فيي وبتقلي شلونك يا مرت عمو ؟
ماشاطرة غير تتصل بفاروق بس
أم عبدو: يه شو هالحكي؟ أي والله لشرطلك حناكا
أم فاروق : لا يوه لا تحكيها شي..........
والله بحبها من جوات قلبي.......... أي أم عبدو ........شو شو صار معكون
مشان الجهاز؟
أم عبدو : والله صرت تقريبا جاهزة يعني فينك تقولي رح خلص
أم فاروق : يه شو خلصتي؟ ماشاء الله حولك
أم عبدو : أي والله
أم فاروق :خليني شوف ابني فاروق شو صار معو بالبيت .....يمكن خلص الدهان
وباقي شوية تمديدات بالمطبخ....فيمكن يخلص بهالجمعة .ورح روح أنا وبناتي مشان نشطف البيت وننضفوا
أم عبدو: على خير انشالله .....لكن ايمت بتحبي نحدد موعد الجهاز؟
أم فاروق : يا ستي ما هاي الاربعاء.....................
الأربعاء اللي بعدا ...........شو رأيك؟
أم عبدو: أي هيك منيح كتير
أم فاروق : لكن خبري جماعتك وجهزوا حالكون عالاخير
أم عبدو: وهو كذلك
أم فاروق : يالله خاطرك خيتو
أم عبدو :الله معك

ومرو هالاسبوعين وإجا يوم الجهازوسوزان طايرعقلا من الفرحة وأم عبدو ماعم تهدا
فمن صباح يوم الجهاز عزلت الصالون تبعها ونضفتو منيح وجابت جهاز هالبنت وحطتو
كلو بهالصالون
وبلشت تجي العالم بها المسا ( من قرايبين العروس طبعا ) وصاروا يعاينو هالجهاز ويشوفوه
ويمدحو ويشكروا منو ومن زوق أم عبدو
والساعة 9 بالليل أجت هالسيارت على بيت أم عبدو واشتغلت هالزمامير بهالحارة
طبعا كان سرفيس فاروق حاضر أول شي وعم يسوقو شريكو لفاروق اللي هوي ابن عمو
ومستأجرلو 3 سوزوكات وكام سرفيس من رفقاتو اللي بيشتغلوا معو عالخط

ووطلعت هالشباب الطيبة على بيت أم عبدو وكان باستقبالن أبو عبدو وابنو عبدو وكام شب
من قرايبينون وبلشوا ينزلوا هالجهاز ويحطوه بالسيارات
وطلعت أم أحمد خالتو لفاروق هيي وكام وحدة وفاتت عبيت أم عبدو وسلمت عليها وقعدوا شربوا
فنجان قهوة وبعد ما خلصوا الشباب تنزيل الجهاز قامت أم أحمد مشان تنزل وهيي طالعة من الباب
مدت ايدها وسحبت مزهرية كانت محطوطة على رف جنب باب الدار وقالتلا لأم عبدو:
شوفي أم عبدو شو أخدت ها انشالله سبع مباركات
ردت عليها أم عبدو: الله يبارك فيكي
( جرت العادة عنا بالجهاز أنو بعد ما يجو أهل العريس وياخدو الجهاز من بيت العروس بتجي
وحدة من أهل العريس وبتشيل أي شي موجود ببيت العروس وبتاخدو لبيت العروس الجديد ولازم يكون
هالغرض اللي بتاخدو مالو علاقة بالجهاز / يعني من أغراض بيت أهل العروس/ وبيسموه عنا
( السرقة ) وممكن تكون السرقة مزهرية أو ابريق ماء أو شي قطعة صمد أو شي لوحة يتتعلق
عالحيط حتى أحيانا بتكون قطعة موكيت صغيرة ممدودة عالارض يعني بالمختصر شوماشافو
أهل العريس شي قريب منهون بيشيلوه وبياخدوه
وللمعلومية في ناس أحيانا (من أهل العروس )بيتقصدوا يحطوا شي قريب من باب البيت
قصدا مشان ياخدوه بيت العريس وهني طالعين......................
وبتلاقوا الناس بيقولوا : والله سرقنا يوم جهاز فلانة من بيت أهلها كذا وكذا
طبعا وهالغرض بيروح وبيصير مع جهاز العروس الاصلي
هاي العادة ولا تسألوني ليش هيك
ونزلت أم عبدو وركبت بهالسيارة هيي وقرايبينها ومشيت هالسيارات وبلشت
الزمامير بهالحارات وبهالشوارع
( يعني هالعادة عنا مو معقولة – يعني حاطين هالكراكيب والشراطيط بهالسيارت واللي بيسموهن
الجهاز وعم يفتلوا فيهون بالشوارع لا ويزمرولن كمان.................ما بعرف ليش
يعني جد عادات غريبة عجيبة حتى للغراض بزمرولهن اييه)
ووصلوا السيارت على بيت العريس اللي مستأجروا طبعا
ونزلت هالنسوان من السيارات وطلعوا لفوق على بيت العريس وبلشوا الشباب يحملوا الاغراض من السيارت لبيت فاروق
واستقبلت أم فاروق الجهاز وأم عبدو بالزلاغيط وصارت تقول

أوها ام العروس الله يعطيكي..
أوها والسعادة بتواتيكي..
أوها وعقبال فرحتك بالكمالة..
اوها وبنجي بنكافيكي..

ليليليليليشش..

وفات الجهاز عالبيت
طبعا بلشت أم عبدو بفتح الجهاز شنتة شنتة وكرتونة كرتونة وكل ما تنفتح شنتو أو كرتونة تبلش هالزلاغيط
كان جهاز أم عبدو لبنتا معقول نوعا ما يعني يخزي العين ما منقصة شي
ملاحظة: العروس سوزان غير موجودة بالجهاز لأنو جرت العادة أنو العروس ما تروح عالجهاز حاكم مو حلوة )
خلص فتح الجهاز وترتبت الاغراض بالخزاين وانحط كل شي بمحلوا
وخلص الجهاز وكل مين رجع عبيتو

وتاني يوم بتتصل أحد النسوان واللي هيي أم فؤاد بأم ناصر اللي هيي بتكون قرايبتا لأم فاروق
وكانت حاضرة بالجهاز وبدا تستفسر منها شو صار بالجهاز وشو طالعولا للعروس
رح خليلكن الحديث بالجزء اللي بعده شو رايكن؟؟؟؟؟؟؟
حاكم حديث مشوق ههههههههههه

ايه دخيل الله يعني ليش العروس مابتروح معهم وقت يطلعو الجهاز؟!مابصير لازم تروح تشوف بيتها !! اعتراض