خطبة على الاطريقة الحمصية

عروس الشام كتب:: ايه دخيل الله يعني ليش العروس مابتروح معهم وقت يطلعو الجهاز؟!مابصير لازم تروح تشوف بيتها !!

شبك عروستنا الغالية

هي العادة وبالشام هيك كمان

عقبال ما يعلقو جهازك على ابن الحلال الي يسر قلبك وخاطرك

من بعد إذنك فارسنا بدي وضحلا لعروستنا

حبيبتي العروس بتكون شايفة بيتها
والجهاز بيصير قبل العرس بكم يوم يعني بتكون العرس غيرت من حالا شوي مثلا لون شعرا
وبعدين بدك العالم وعريسا يشوفوها قبل يوم فرحتا
يعني بتفضل تكون يوم الفرحة الكبيرة
تكون غير حتى على خطيبا

أما شو فارسنا الغالي عم توصف الحالة مع التفاصيل كإنك من عنا
وشايف وبتعرف كل شي
حتى أكتر مني بكتير
بانتظار الحديث اللي بدو يكون فيه .........
يسلم إيديك

اي خدي راحتك رنيم

شرحيلها ووعيها

ههههههههههههههههههههههههههههههههه

شكرا بس وين الباقي ؟؟

رنيم كتب:: شكرا بس وين الباقي ؟؟

طولي بالك خانوم

تكرمي

الحلقة الثالثة عشر

اي ياجماعة وهلأ رح تشوفوا الحديث بين أم فؤاد وأم ناصر اللي هيي بتكون قرايبتا لأم فاروق اللي وعدتكن فيه بالجزء الماضي

ام فؤاد: مرحبا أم ناصر
ام ناصر: يي اهلين ام ناصر شلونك خيتو شو أخبارك
ام فؤاد: والله الحمد لله ماشي الحال شو أخبارك انتي انشالله منيحة؟
ام ناصر : بخير الله يسلمك
ام فؤاد : مبارك ما عملتو خيتو.........شلون كان جهازكون مبارح؟
ام ناصر: الله يبارك فيكي يا رب وعقبال فرحة فؤاد...............
والله هالجهاز مانو كل هالأد والله يا خيتو
ام فؤاد : يه ليش؟
ام ناصر: أي والله يا خيتو..........شو هالام عبدو هاي والله طلعت قليلة فهم
ام فؤاد : يه أمانتك الله
ام ناصر : أي والله متل ماعم قلك .....
تكوني جاي وشايفي بعينك على هالجهاز المشحر .......صحي ولك ليش ما رحتي؟
ام فؤاد: والله كنت ماني مبسوطة مبارح ...هيك تعباني شوي
ام ناصر: على خير انشالله
ام فؤاد: أي احكيلي ولك خيتو شو مطالعتلها لبنتها هالمنظومي؟
ام ناصر: استني لجلس قعدتي مشان اعرف احكي منيح...........
ام فؤاد : يه مبين في حكي كتير معناتا
ام ناصر : سمعي لأحكيلك.......هادا يا خيتو اجا هالجهاز وطالعوه وفوتوه على هالدار
وحطوه بالمحرك وبالكاريدور
واجت ام عبدو وفوتت الشناتي الكبيرة اللي فيها التياب على أوضة النوم وفتحت أول شنتاي وبلشت تطالع
أم فؤاد : ايه كملي لشوف
أم ناصر: وعينك ما تشوفي هالتياب المطالعتلا ياها ..شي بكب وبيعمي الله وكيلك
ام فؤاد : وشو مطالعة؟
ام ناصر : يا ستي مطالعتلا كام داير من هدول المكسرات .........مين عاد لبسو هادا,
بدا تطالعها لبنتها متل الست المقدرة
وكام بلوز وكام كنزة صيفي وشتوي ........بس شو .............
من وين جايبتون ما بعرف.........من البالة من البسطة .الله أعلم.....
كلو من هادا المعرق واللي عليه هالورد وهالملون والاصفر والحمر ييييييي.........
متل تياب النور الله وكيلك ومطالعة يا ستي كام توينز (قطعتين يعني ) كلو من هادا المسفسف
واللي كمامو طويلة ....ما عجبوني والله منوب
ام فؤاد: يه يه يه بحياة الله عم تحكي جد؟
أم ناصر: أي والله متل ماعم قلك.....ومطالتلا شي 10 جواز كنادر كلو من هادا اللي بيلمع
وعليه هالبهرجان ....تقولي بدها ترقص فيهون
ام فؤاد: هههههههههههه
أم ناصر: لا وشوفي هالكنادر كلن كعب 11 مع انو بنتها مانا قصيرة والله ....
فلشو هالكعب العالي ما بعرف
ام فؤاد : أي وشو كمان
ام ناصر: يا ستي ومطالعتلها كام طقم وروب سهرة .....هدول ها يعني ماشي حالون.
ما اشبون شي ومعون شي ست سبع جزادين بس مانن جايين عكسم هالطقومي والرواب ......
كل شي شكل الله وكيلك
أم فؤاد: أي وشو مطالعة كمان؟
أم ناصر: ومطالعتلا كام تنورة من هدول القصار وكام كنزة قطن متل تبعوت هدول البنات
النص كم واللي على أد الجسم ........شي مسفلئ وشي مزلط وشي حفر ....
شي بيفجج الراس الله وكيلك ........
ام فؤاد: ها ها ليكي الضرصاني ليكي ....الله يهدا يا حق ....اي وشو كمان؟
ام ناصر: مطالعتلا كام تفريعة من هدول الرخاص تبعوت البسطات أم ال75 ...
قال هدول للبيت...........ولك اشتهيتا
تكون مطالعة شي كام جلابية أو كام عباية من هالتقال ....مافي هيك شي الله وكيلك

أم فؤاد: يه والله شي بسود الوجه ...........اي وشو كمان ؟
أم ناصر: ومطالعتلا معون كام بيجاما من من هدول القطن وكام شحاطة ومطالعة
للمطبخ طقم طناجر وكام طقم فناجين قهوة وصحون الايشاني وشوية معالق وسكاكين
ام فؤاد : يه بس؟
ام ناصر: وكام مزهرية وكام قطعة صمد وثريتين وقال على أساس جايبتون من عند (..)....
بس وقت بتشوفيهون بتقولي هدول جايبتون من سوق المسقوف
لا وحزري شو ؟................مطالعتلا كام شقف زريعة تبعوت
ورق الصالون ....مين عاد طالعوا هادا بالجهاز ولك أختي أاا قوليلي بس
ام فؤاد : يه العين تطرقا انشالله ......كل الجهاز هيك؟
ام ناصر : أي والله يا خيتو شي بكب وبيعمي كلو كراكيب مالا طعمي حبالتي حقو .
لك اشتهيت شفلي شي سجادة تقيلة أو شي بدلة سهرة تقيلة أو شي طنجرة ضغط للمطبخ
أو شي طقم حرامات مقبل أو شي شنتاية سامسونايت للصيغة والذهب.....
ما شفت شي يعبي العين .....والجهاز كلو على بعضو ما عجبني والله يا خيتو
هادا غير الضنا اللي عم ترمح بين أجريكي هون وهون الله وكيلك انطوش راسي ما عرفت
ايمت خلص هالجهاز المشحر وأخدت تكسي ورجعت عبيتي
ام فؤاد :يه بكرا لكن بعد العرس اذا رحنا عالمباركة منشوف عاد شو ملبستا لبنتها
ومنشوف شوي من الهالجهاز
أم ناصر: أي والله على خير انشالله
ام فؤاد :بدك شي خيتو؟
ام ناصر :سلامتك...خلينا نشوفك أماني ها
أم فؤاد : انشالله ما منستغني ...خاطرك
ام ناصر :الله معك مع السلامة

(هادا الحكي دار بين جماعة من أهل العريس وعطو رأيون بالجهاز , هلأ شوفو شلون بينظروا أهل العروس
للجهاز كمان بنفس الطريقة السابقة)
تاني يوم بتفوت أم هيثم جارتها لأم عصام أختا لأم عبدو بدها تصطبح عندا ويشربوا فنجان القهوة
ويحكوا عن الجهاز فشوفوا شلون صار الحديث:
دقت أم هيثم الباب الصبح على أم عصام وفتحتلا أم عصام وهيي عم تحط عراسا الايشارب
أم عصام : مين ؟
ام هيثم :انا ولك أنا أم عصام
أم عصام : يه أهلين شلونك أم هيثم
أم هيثم: ولك صرلي ساعة عم دق عالباب شو نايمين لهلأ؟
أم عصام : أي والله يا خيتو مبارح ما رجعنا عالبيت للساعة 3 الصبح.....تفضلي فوتي
أم هيثم : يزيد فضلك....مبارك ما عملتوا ....شلون كان جهاز بنت أختك مبارح؟
أم عصام: الله يبارك فيكي والله لايئ عين الله عليه .........
استني لفوت أعمل القهوة وجاييتك تفضلي على أوضة القعدة
وراحت أم عصام عالمطبخ و عملت فنجانين قهوة ورجعت على أوضة القعدة وقعدت هيي وجارتا يحكوا:
أم عصام : والله يا خيتو شو جهاز وشو جهاز طلع........
شي بياخد العقل .....كامل مكمل ماناقصوا شي
أم هيثم : يه أي تتهنوا والله والله سوزان بتستاهل وبتتقل بالذهب ......الله يخليلا هالام
أم عصام : الله يسلمك ويحفظك
أم هيثم : أي هاتي لنشوف شو مطالعتلا أختك لبنتا؟
أم عصام : ييييي قولي شو ما مطالعة .....الله وكيلك يا خيتو حطوا هديك الحسبة حق هالجهاز
وكلو من أحسنوا والله وصهري أبو عبدو ما قصر يا خيتو حط كومة مصاري على جهاز بنتو
أم هيثم : الله يفرحوا فيها يا رب ويتمملكون على خير .......اي احكيلي هاتي لنشوف
أم عصام : شو بدي احكيلك لأحكيلك ......عدي معي
أول شي التياب ما رح احكيلك من الدواير شي سبعة تماني ومن البناطلين شي سبعة تماني هادا غير
البلايز والتوينزات والقمصان والبلوزات والكنزات .....كومايات كومايات الله وكيلك وكلو من الغالي
أم هيثم :يييي تتهنو والله وشو كمان أختي أم عصام
أم عصام : عينك تشوفي الكنادر والشحاطيط الله وكيلك وقت حطيناهون بكومودينة الكنادر
ما ساعت هادا غير مفارش التخوت واللمبديرات والبرادي والمخدات ..............
ولك شوفي بس طقم مفارش التخوت الحرير المشكوك والمطرز الله وكيلك لبنت وزير ما طلع هيك
أم هيثم : ييي ماشالله
أم عصام: ييي يا خيتو عينك تشوفي طقومة السفرة والايشاني والصحون والطناجر
وطقومة المعالق والشوك والسكاكين كلو راحت جابتو أختي من عزاز الله وكيلك.....
هادا غير طقومة السهرة اللي نزلت عالشام اشترتون
.............والحرامات اللي وصت عليهون من حلب
أم هيثم : ها ها يخزي العين وشو كمان خيتو؟
أم عصام: شوفي البقج اللي انحط فيهون الجهاز وانضب بالخزاين كلو من هادا المطرز
والمشكوك شي بياخد العقل الله وكيلك
وطالعتلا أختي كام شقف زريعة للصالون بياخدو العقل ...........
عينك تشوفي قال ما عجبون ..........نطت وحدة جاي من عندون وقالت:يه هادا لشو مطالعينو ؟
عجبك ولك يا خيتو
أم هيثم : يي العين تطرقا انشالله شو بيفهمون....اي والله الزريعة والخضار روح بالبيت ولك خالتي
أم عصام: شو بيعرفني ولك يا خيتو..............
أصلا أسافتا بنت أختي يعطوها لهيك عالم بس شو بدو يحكي الواحد ..............النصيب
أم هيثم : أي والله نصيب هادا يا خيتو.....ودخلك شو جايبي كمان؟
أم عصام: مطالعة لأم فاروق وبناتا كل وحدة قطعة قماش من هالتقال ومطالعة للعريس بيجاما
وشحاطة من التقال وشوية غيارات ومطالعة لأبو العريس بيجاما شتوية جوخ الله وكيلك..........
لكن أختي أم عبدو فهمانة وبتعجبك ما قصرت مع الجماعة الله وكيلك...
بس بدك حدا يقدر ....عينك تشوفيون شلون زاغوا عيونون
وقت شافوا البدلة السودة اللي مطالعتلا ياها أختي لبنتا سوزان ...........
يي يا خيتو شي بياخد العقل ....الله وكيلك كلفتا لأختي 8 الاف
أم هيثم: أماني بضهرك عم تحكي عنجد؟ 8 تالاف؟؟
أم عصام : ولك أي
أم هيثم : ماشاء الله والله شهيتيني شوف هالجهاز
أم عصام : انتي التاني الله يصلحك ليش ما رحتي؟
أم هيثم : والله يا خيتو كانت سلفتي عندي وما طلعت للساعة 11 بالليل قلت ماعاد لحق
أم عصام : والله يا خيتو جهاز وجهاز شو بدي عدلك لعدلك .........
الحكي ما متل الشوف يا خيتو .........خمس سيارات ما ساعتو .............
شي كتير كتير
أم هيثم : بكرا بالمباركة انشالله بتفوتيني عالبيت لجوا لأتفرج عليه
أم عصام : أي لكن لكن تكرم عينك
أم هيثم : وايمت العرس انشالله؟
أم عصام : بعد بكرا وعليكي خير.........تفضلي ها لا تنسي
أم هيثم : لا يي بدي اجي لكن .....منشوفك هنيك معناتا
أم عصام : انشالله ...........
أم هيثم : يالله خاطرك بدي قوم لحق اطبخ واعمل البيت
أم عصام: لك عديلك شوي لسا ما شفناكي
أم هيثم : يبعتلك الهنا الباب عالباب ايمت ما بدك بتشوفيني
أم عصام : يه أي والله
أم هيثم : خاطرك
أم عصام : مع السلامة

وهيك يا جماعة خلصنا من الجهاز وبقي علينا العرس وتحضيراتو

شلون بالله ؟؟
ما نموا كتيرهالنسوان وهذا غيض من فيض يي لسا ما حكيتلكن
شو حكوا البقية
لو بحكيلكن شو حكوا ام عمر اللي هي مرت اخوها لام عبدو مع ام سامر اللي هي بنت حماها لام فاروق لتتعجبوا
بس يلا هاي عينة

وهانت ياجماعة لا تملوا حاكم قرب العرس

يا إلهي هالناس
شوما صار ما بيعجبن وما بيقدرو بلا ما يحكوا

بالإنتظار

لك ولي على هالناس شو بتحب تلت وتعجن لك والله حرام عليهم ايه اصلا هيك ناس مابيستاهلو انهم يروحو معهم على بيت العروس..

يالله فارس هات اللي بعدوو..

ايه والله

لابيعجبهم عجب ولا صايم رجب

رنيم كتب:: يا إلهي هالناس
شوما صار ما بيعجبن وما بيقدرو بلا ما يحكوا

بالإنتظار

هيك نا س لازم يكون في نميمة

مشكورة رنيم

عروس الشام كتب:: لك ولي على هالناس شو بتحب تلت وتعجن لك والله حرام عليهم ايه اصلا هيك ناس مابيستاهلو انهم يروحو معهم على بيت العروس..

يالله فارس هات اللي بعدوو..

اي والله ما بيستاهلو شي

بس هي النسوان ما بيخلصو نميمة

هههههههههههههههههههههههههههههه

تكرمي يلله

شاعر الرومانسيه كتب:: ايه والله
لابيعجبهم عجب ولا صايم رجب

اي والله عبدالله
الناس لا بيعجبها العجب ولا الصيام برجب

مشكور على مرورك حبيب قلبي

الحلقة الرابعة عشر

سوري اني تأخرت عليكم
بس هاي رجعنا مع ليلة العمر
وإجا يوم العرس
اليوم اللي بيستناه كل العرسان
ليلة العمر,ليلة السعادة, ليلة الحب والوفاق, ليلة ولا ألف ليلة وليلة
بليلة العرس حكا فاروق مع سوزان آخر تلفون بيحكوه الخطيبين بين بعضون قبل يوم العرس
ومتل ما بتعرفوا يا أحبائي هادا التلفون بيكون إلو نكهة خاصة وعذوبة غير شكل
( طبعا اللي متجوز أكيد بيعرف هالشي واللي ما تجوز لسا رح يجيه هيك يوم ويحس فيه )
رح جيب مقطع من حديث سوزان مع فاروق عالتلفون ليلة العرس طبعا مشان ما نطول عليكون

- طبعا مافي داعي نقول أنو أم فاروق وأم عبدو كل وحدة رافعة من عندها السماعة وعم تتسمع عالحديث الدائر
فاروق: أي سوزانو وين راح صوتك؟
سوزان : هون موجودة بس بردانة كتير
فاروق : ليش مانكون مشعلين الصوبيا؟
سوزان : لا انطفت , يمكن خلص المازوت تبعها مشان هيك تغطيت بالحرام
فاروق : من بكرا ورايح انشالله كل أيامك رح تكون دافية
سوزان : عنجد؟؟؟؟؟؟؟؟؟
فاروق : لكن عنجد , خلص يا سوسو هانت يعني كلها كام ساعة ومنصير سوا على طول
سوزان : فاروق
فاروق: يا عيون فاروق وقلب فاروق وروح فاروق
سوزان : خيفاني
فاروق : من شو خيفاني يا عمري؟
سوزان : من بكرا
فاروق : هلأ حدا بكرا عرسو ورح وبدو يضل مع حبيبو على طول بيكون خيفان؟
سوزان : لك لا يا الله منك مو هيك قصدي
فاروق : لكن شو قصدك يا قلبي؟
سوزان : ما بعرف بس حاسي حالي بمنام ؟,بعدين زعلاني على بابا وماما وأخواتي شلون بدي اتركون
على طول
فاروق : معليش سوسو بكرا بتتعودي و هاي سنة الكون بعدين ليكي بيتنا قريب من القصور يعني فركة
كعب بتكون أمك عندك أو انتي بتكوني عندها
سوزان : يالله يا فاروق , بحياتي ما شفت أرق والطف منك
فاروق : الله لا يحرمني منك يا رب...........
سوزان : قلي هلأ , شو شكلا السيارة اللي بدك تطالعني فيها بكرا؟
فاروق : لك أحلى سيارة لعيونك ............سيارة رفيقي عمار مازدا 929 لونها أزرق بتطير
العقل وباخخها جديد طالعة وكالة بكرا المسا بدو يروح يزينها ويجهزها
سوزان : والصالة حلوة؟
فاروق : لكن يا عيوني صالة() أحلى صالة بحمص الله وكيلك
سوزان : بس بيقولو في أحلى منها
فاروق : لا أحلى ولا شي هاي أحسن وحدة , صدقيني لأعملك عرس ما انعمل بحمص كولاياتا
أم فاروق وهيي عم تسمع بتقول لحالها: هلأ صالة () ماعاد تعجبها وتعجب أهاليها ؟؟؟
تروح تشوف أختها اللي عملولا عرسه بأرض الدار تبعت بيت حماها , ما بيكفي استأجرنالك صالة أنتي
وأهاليكي ؟؟
كمان أم عبدو وهيي عم تتسمع بتقول لحالها : ولي على حظك المشحر يا بنتي , مالقوا غير هالصالة يعملولك
عرسك فيها ؟؟؟ قلة صالات بالبلد .............اي يدفعولن شوي زيادة ويعملولك عرسك بشي صالة مقبلة ؟ الله يهدك يا أم فاروق شو قوية , كلو شغلك وجئك ولوصك هادا
سوزان : آآآآآآآآآآآآآهههههههههه
فاروق : ليش عم تتاوبي؟ شو نعستي؟
سوزان : أي والله , شفت صارلنا تلت ايام ما هدينا
فاروق : طيب حبيبي روحي نامي مشان بكرا تكوني مصحصة عالآخر
سوزان : يالله وأنت روح نام كمان مشان ما تجيني بكرا عالعرس وعيونك دبلانة
فاروق : أنا نام ؟ لك من وين بدو يجيني نوم وبكرا يوم هنايي وسعدي مع حبيبة قلبي
سوزان :ههههه يالله منك خلص بئا,,,,,يالله روح نام ,,,,,تصبح على خير
فاروق : وانتي من أهلو يا روحي, ............ما نسيتي تقوليلي شي؟
سوزان : ييي علينا , بكرا بقلك يها لتمل منها
فاروق : بدي اسمعها منك آخر مرة ونحنا خاطبين
سوزان : ليش شو فرقت ؟
فاروق : فرقت كتييييييييييييييييييييييير
سوزان : بحبك
فاروق : قوليها كمان مشان الله
سوزان :بحبك بحبك بحبك
فاروق : لك يقبرني الله اللي خلقك يا حبيبتي .......وأنا كمان بحبك
أم فاروق وهيي عم تتسمع بتقول لحالها : حبك برص انشالله
أم عبدو وهيي عم تتسمع بتقول كمان : يه رح ياكلها للبنت عالتلفون أريضة اللي تئرضو انشالله ماعاد يستنى
لبكرا؟
فاروق : باي حبيبتي
سوزان : باااي

وسكروا الأربعة السماعة وراح كل واحد على تختو مشان ينام ويحلم بيوم بكرا شو جايب معو

واجا يوم العرس
وبيت أم فاروق وبيت أم عبدو ملتاشين لوشة إلها أول ما إلها آخر
رح نحكي شوي عن تحضيرات بيت العريس وبيت العروس ليوم العرس بس كل مين لحال

بالنسبة لبيت أم فاروق :

- أم فاروق وبناتا راحوا بعد العصر لعند الكوافيرة مشان يعملوا شعرون
المهم اجا دور بسمة بنت أم فاروق فقامت وقعدت عالكرسي تبع الكوافيرة
الكوافيرة : أهلين وسهلين
بسمة : أهلين فيكي
الكوافيرة : شلون بتحبي أعملك شعرك؟
بسمة: والله ما بعرف شو رأيك انتي ؟ يعني شعري شو بيلبقلو؟
الكوافيرة: شو رأيك أعملك شنيون
بسمة: شلون بدك تعمليه؟
الكوافيرة: رح ارفعلك ياه من ورا ولفلك ياه لجوا وثبتلك ياه بالبكل والفكساتور ومن قدام رح اعملك
الغرة لفوق وخليها عالية شوي ورح جعدلك السوالف , كتير حلو بيطلع
بسمة : هيك قولتك
الكوافيرة : أي لكن هيك دارج هالايام
بسمة : يي بس ما بدي روح عالعرس لاقي كل العالم عاملة متلي , بعدين لا تنسي أنا أخت العريس فلازم يكون
موديل شعري حلو, ولا شو رأيك ماما؟
أم فاروق: أي أمي لكن, بس أنا رأيي تعمليه متل ماكانت عاملتو بنت جارتنا أم حازم وقت حضرنا مباركتها
بسمة : لا ماما هداك الموديل ماعاد حدا عمل متلو..........خلص خلص اعمليلي متل ما قلتيلي
الكوافيرة: اوكي
وعملت الكوافيرة الموديل لبسمة وطلع كتير حلو
وقامت بنتا الثانية لأم فاروق سهير وقعدت عالكرسي وقالتلا لكوافيرة: أنا بدي ياكي تقصيلي شعري كاري
أم فاروق : يه ليش بدك تقصيه ولك بنتي ؟ خليه هيك طويل والله أحلا
سهير: لا , بدي غير الموديل ورفقاتي قالولي إنو كتير بيلبقلي الشعر الكاري
أم فاروق : ولك شو بدون يحكوا عليكي العالم هلأ بالعرس , بيقولو ليكو أختو للعريس طالعة متل حسن
صبي
سهير : أي يحكوا اللي بدون ياه , ماما أنا هيك عاجبني
أم فاروق : تصطفلي
وقصت سهير شعرها كاري وعملت سيشوار
وبعد ما خلصت سهير إجا دور أم فاروق لتعمل شعرها فجلست عالكرسي وقالت للكوافيرة:
خيتو شوفي شو رح قلك.سشوريلي شعري متل العادي يعني ما بدي موديل معين واذا عندك من هادا البخاخ
اللي بيلمع بخيلي شوي على شعري
بسمة: يه يا أمي لشو هادا اللي بيلمع بدك تحطيه على راسك ........شو بدون يحكو علينا العالم؟
أم فاروق : انتي سكتي شو بيفهمك
سهير : أي تركيها تحط اللي بدا ياه , عرس هادا حبيبتي بعدين أمك من زمان ما عملت شعرها هيك شي موديل
حلو
وعملت أم فاروق شعرها وبختلها الكوافيرة من البخاخ اللي بيلمع وصار شعر أم فاروق عم يلمع لمعان
غير شكل تحت ضو التريا

وخلصوا الجماعة من عند الكوافيرة ورجعوا عالبيت ولبسوا تيابن استعدادا للعرس
وكان لبس الجماعة كالآتي:
- أم فاروق لبست طقم لونو نيلي وعليه على صدرو ألماسات صغار مشكوكين على شكل وردة
- سهير لبست تنورة سودة طويلة وفوقها توينز كمامو شيفون ولونو أسود ومشكوك بالسيلان
والبرق على صدرو وكمامو والبادي تبعو لونو أبيض
بسمة : لبست تيور لونو بيج وطراف كمامو وقبتو لونن بني
وطلعوا الجماعة وراحوا على الصالة مشان يبلشوا يستقبلوا الناس الجايين عالعرس

بالنسبة لفاروق:
طبعا فاروق بعد العصر فات عالحمام تحمم وطلع ولبس تيابو وراح لعند الحلاق صاحبو وحلق شعرو
وحلق دقنوا وعمل سيشوار ورجع عالبيت ولبس البدلة السودة اللي اشتراها من عند (.............)
وتعطر ولبس الكندرة الجديدة وقعد بالصالون هوي وأبوه ليستقبلوا الرجال اللي بدون يجو على سهرة العريس

بالنسبة لبيت أم عبدو :

سوزان عم تنط هون هون مانا عرفاني شو بدها تساوي وعم تقول:
وينا بدلتي البيضا .؟ ليش لهلأ ما إجت من عند الخياطة؟......وين كندرتي هلأ حطيتا هون؟؟؟
.....وين حطيتي العلامة تبعيتي ماما؟؟..........ليش لهلأ ما أجت بنت عمي إيمان ؟
بدي ياها ضروي ؟ ماما حميتي الحمام بدي فوت أتحمم .........ماما اتصلي بخالتي
أم عصام وقوليلا تجي هيي وبناتا بسرعة..........يا ربي أديش الساعة هلأ ؟؟
..........لا نقوم نتأخر
أم عبدو : ولك بنتي شبك ؟ , طولي بالك ليش هيك متلهوجي . اقعدي كنيلك شوي هلأ بيجو الجماعة
, علامتك جوا عندي بأوضة النوم عالشوفنيرة وهلأ بتجي البدلة من عند الخياطة

رن الجرص

وركضت سوزان متل المجنونة وفتحت الباب وإذ ايمان بنت عمها لسوزان عالباب
سوزان : يقطع عمرك ليش لهلأ ؟
أم عبدو: أهلين خالي إيمان كيفك ؟
ايمان : أهلين مرت عمو , الحمدلله ماشي الحال
ام عبدو: وينا أمك خالي ليش ما أجت معك؟
ايمان : عم تلبس هلأ بتجي
وبعدين لبست سوزان تيابها وراحت هيي وايمان لعند الكوافيرة نفسها اللي راحو لعندها وقت الخطبة
وعملت شعرها ورجعوا عالبيت بسرعة
وكانت البدلة البيضا بوقتها إجت من عند الخياطة فدخلت سوزان على غرفتها
ولبست البدلة البيضا تبعت العرس وفاتت إيمان وأم عبدو وأم عصام مشان يحطوا الماكياج على وجه
العروس وشوفوا شو صار.........
أم عصام : وينا علبة الزوقة؟
أم عبدو : ليكيها أختي هون
أم عصام : أعطيني لشوف المايعة
أم عبدو: خدي أختي
سوزان : لا تكتريلي كتير من المايعة خالي بعدين عيوني بيدمعو
أم عصام : ولا يهمك خالتو
وحطت أم عصام قلم الكحلة المايعة على عين سوزان وسكرت سوزان عينها وسحبت أم عصام قلم الكحلة هديك
السحبة ففاتت كل الكحلة بعيون سوزان وسحبتلا ياها لبرا وشطتها شط لفوق
سوزان : أي أي وقفي وقفي خالي , فوتي الكحلة كلها بعيوني
أم عصام : فتحي عينك ,............فرجيني لشوف.............
أي لا مافيهون شي عين الله عليهون
و حرحروا عيون سوزان واحمروا ودمعوا
إيمان: وقفي لحطلك المسكارة
أم عصام : وينا البودرة تبعت الوجه ؟..........هاتي أختي هاتي لنحطلها شوي خلي خدودا يوردو
إيمان : اعطيني قلم الحمرة من جنبك
أم عصام : مسكي ايمان هادا القلم وحدديلها شفايفا
أم عبدو: ولك أختي حطيلا شوية بياض سليماني خليها تبيض شوي
أم عصام : أي هاتي لنشوف لنحطلها شوي

وهيك ضلوا عم يشتغلوا بزوقة هالعروس شي ساعة............
بس شلون طلعت بالآخر..........من تحت إيدين الجماعة...............
شغلي كبيري

وبعد الماكيا حطت الطرحة على راسها وثبتولا ياها بتاج ألماس اصطناعي صغير ودلقت على حالها نص قنينة
بارفان
ولبست الكندرة البيضا اللي كعبها 11 سم وراحت وانصمدت بالصالون
وبلشت العالم اللي من أهل العروس تكفت كفت لبيت أم عبدو والكل عم يستنوا سيارات بيت العريس لتجي
وتاخدهون عالصالة
والمسجلة شغالة والزلاغيط عم تلعلع ببيت أم عبدو

بهالوقت كان العريس عم يقضي أحلى اللحظات هوي وأبوه وأخواتو وولاد عمو وولاد خالو ورفقاتو وقرايبينو
بسهرة حضر فيها مطرب حمص المعروف أبو مروان وفرقته وبحضور فرقة السيف والترس
والعراضة المعروفة في مدينة حمص بس هاي رفقاته الحلبية لفاروق تولوها بجد ماقصروا معه وعملوا اللي عليهن وزيادة وعملوله احلى عراضة
لعلمكون أبو مروان بكون رفيقو لأبو فاروق الروح بالروح وحلف يمين إلا ما يجي ويغني بسهرة عرس فاروق
ابنو لصديق عمرو
واللي جاب فرقة السيف والترس هوي ابن عمو لفاروق وشريكو عالسرفيس ( كنقوط يعني )
وغنى أبو مروان الطش ورقص العريس ورقص أبو العريس ورقصوا المدعويين جميعا

ووقت صارة الساعة 10 ونص قام ابن عمو للعريس وقال : يا جماعة الخير ...على حب النبي
اللي عندو سيارة يتفضل معنا بدنا نروح نجيب العروس من بيتها والباقين يقعدوا يكفوا السهرة لأنو نحنا راجعين

وقامت الشباب الطيبة اللي عندن سيارات (أو بالأحرى اللي مستأجرين سيارات ) ونزلوا وركبوا بسياراتون
وطبعا فرقة العراضة كانت جاي معون أكيد
وانطلق موكب السيارات عم يزمر بهالشوارع هيييييييييييك لوصل لبيت العروس
واشتغلت الزمامير بالحارة
وانمدت الروس من عالبرندات من بيت أم عبدو وطلعت الجيران من البنايات المجاورة لحتى يتفرجوا شلون
جاييين بيت العروس ياخدوا العروس
نزل فاروق من السيارة المازدا وكانت أمو وأختو واصلين على بيت أم عبدو وعم يستنوا وصولو
ونزلت فرقة العراضة وعملتلوا عراضة لفاروق على باب مدخل بناية أهل العروس قبل ما يطلع لفوق
ومن ما يقال في العراضات:

صلوا على محمد
مكحول العين
نير وغضير
وعادينا
الله عليه

ولاتفرعلوا لاتفرعلوا
للقميص وللطاقية
وللشروال وللصدرية
وشنغليلي شنغليلي . الله يعينو على هاليلة ومن هالليلة وصارلوا عيلة
وعريس الزين يتهنى
يطلب علينا ويتمنى
يطلب الروح لأديلو
والروح أغلى وما عنا
وعريس الزين ما بيعك
لو جبلي تمر خالي
وهي ويالله وياماشالله

ياسباع البر حومي
اشربي ولاتعومي
اشربي من بير زمزم
زمزم عليها السلام
و ياسلام اضرب سلام

وبعد ما خلصت العراضة طلع العريس لفوق على بيت عروستو بالطاببق التاني
واستقبلتو أمو من عالباب بالزلاغيط واجت مرت عمو أم عبدو واستقبلوا وفوتوا عالصالون وكانت سوزان
بانتظتاروا وهي بأبهى حلة
ووقت شافا فاروق عجبتو كتير وطار عقلوا وابتسامتوا صارت شبر على وجهو وهيي بالبدلة البيضا والطرحة
على راسها
وجلس فاروق جنب خطيبتو وجابولو القهوة فورا
ودار بين فاروق وسوزان وهني عم يشربوا القهوة الحوار السريع التالي:
فاروق : يا لطيف شو حليانة
سوزان : تسلم هادا من زوقك
فاروق : طالعة متل الملاك بهالبدلة البيضا
سوزان: وأنت بتجنن كمان....... غير شكل طالع اليوم
جلس فاروق قعدتو ونفش حالو وقت سمع هالكلام وأنّش
فاروق: مبسوطة ؟ ولا لساتك خيفاني؟
سوزان: يعني ....... هيك وهيك
فاروق: يالله خلينا نقوم نمشي
سوزان: يالله
وغمز فاروق أمو أنو بدو يقوم لازم يمشو
أم فاروق: يالله يا جماعة لبسوا بدنا نمشي.........وينك أختي أم عبدو يالله تفضلي
وقاموا الجماعة ولبسوا المانطيات وحطوا على راسون ومسك فاروق عروستو من ايدها وقاموا يمشو
وهون بهاللحظة أم عبدو ركضت عالمطبخ وصارت تبكي
ولحقتها أختها أم عصام وكام وحدة من قرايبينها وصاروا يواسوها
أم عصام: ولك أختي ليش عم تبكي......فوق ما تفرحي هاي بنتك كبرت وبدها تتجوز وتروح مع
عريسها
أم عبدو: والله ما بإيدي يا أختي والله زعلانة شلون بدها تتركني هالضرصاني والله رح اشتقلها كتير
وحدة من المعازيم : طولي بالك أم عبدو ....مسحي دموعك ويالله تعي نمشي ......
هلأ اذا شافتك بنتك عم تبكي والله بتقطعيلها قلبها
أم عصام : يالله أختي هاي سنة الكون ....الله يحسن أيامها يارب.......
ادعيلها أختي ادعيلها
أم عبدو: الله يوفقها ويحميها يا رب
أم عصام: يالله أختي مسحي دموعك وروحي طلعي مع بنتك وجوزها وخليكي قوية
أم عبدو: يالله

وطلعت أم عبدو من المطبخ ومسحت دموعها ومشي ورا بنتها وقلبها عم يتقطع عليها
وفرحانتلا بنفس الوقت
ونزلوا الجماعة عالدرج والزلاغيط شغالة
ووصلوا لتحت وركب فاروق وسوزان بسيارة المازدا وركبت أم عبدو من قدام جنب الشوفير
وكبوا النسوان بالسايرات والسرافيس

وبلشت الفتلة

منرجعلكون بعدين لنكملكون القسم الاخير من قصتنا الشيقة وعرسنا الحمصي...

هههههههههههههههههه
ياريتني كنت عم بحضر العرس معهم عنجد كتير اجا ع بالي ..
يالله مبروك لسوزان وفاروق فارط ضحك

منتظرين اخر حلقه فارس..

عروس الشام كتب:: هههههههههههههههههه
ياريتني كنت عم بحضر العرس معهم عنجد كتير اجا ع بالي ..
يالله مبروك لسوزان وفاروق

منتظرين اخر حلقه فارس..

الف مبروك للعريسين

هههههههههههههههههههههههههههههههههههه

اسرني جدا مرورك عروس الشام الغالية

انشاء وانت سالمة

يا الله ما أصعب هي اللحظة
كتير صعب كيف بتترك إخواتا والبيت اللي ربيت فيه وهيك تنتقل ع حياة تاني
ياربي

بالإنتظار

رنيم كتب:: يا الله ما أصعب هي اللحظة
كتير صعب كيف بتترك إخواتا والبيت اللي ربيت فيه وهيك تنتقل ع حياة تاني
ياربي

بالإنتظار

هي سنة الكون عزيزتي

عقبال عندك

دمت لنا

ضحك

الحلقة الخامسة والاخيرة

ومنرجع لنكملكون القصة اللي شارفت على نهايتها

طلعت الفتلة تبع العرس
وسيارة العروس المازدا ماشي أول شي ومن بعدها سيارة المرسيدس البيضا 280 وبعدها 3 سيارات تكسي
صفراء وبعدها 3 سرافيس

وكانت الفتلة بلشت من القصور مكان بيت أم عبدو وطلعت السيارات على طريق حماه ومنه الى طريق الكورنيش
وبعدها لفوا من عند المسلخ القديم عاليسار واتجهوا باتجاه الساعة الجديدة وطلعوا عند الساعة مشيوا بشارع
السرايا لآخرو لحتى وصلوا لعند الساعة الجديدة ولفوا الساعة ورجعوا باتجاه الساعة الجديدة ليفوتوا بالدبلان
وفاتوا بالدبلان (هاي مناطق حمصنا البية هههههههههه)
ووقفوا العالم ليتفرجوا على فتلة العروس
شوفوا كيف كان المشهد
سيارة العروس مزينة بشرايط حمراء وخضرا وصفرا وعليها بالونات
والسرافيس راكب فيها نسوان غير شكل وفي وحدة من النسوان جاي مع بيت أم فاروق معها دربكة
وعم تدق عليها واللي معها عم يغنوا ويسقفوا
وفي بنات مطالعين ايديهون من الشبابيك وعم يلوحوا بالمحارم
والزلاغيط شغالة
والزمامير عم تللع
وفي سرفيس من السرافيس زمورو الله لا يورجيكون
صوتوا متل شي واحد عم يشخر
والشوفير حاطط ايدو على الزمور وما عم يشيلوا
والناس اللي بالدبلان انزعجوا من هالشوفير القليل الزوق اللي صوت زمورو بينكرز البدن
وفي سرفيس تاني معلي المسجلة عالاخير وحاطط أغنية لعلي الديك تبع علوش
والناس اللي بالسرفيس مبسوطين عالاخر
وبسيارة العروس كان فاروق قاعد جنب سوزان وابتسامتو شبر
وسوزان خجلانة ووجها أحمر متل التوت وفرحانة كتير وقلبها عم يرقص بمحلو
وأم عبدو قاعدة من قدام ومتكتفة وعم تقول بقلبها ( الله يمضي هالعرس على خير )

وبعدين طلعت السيارات على شارع البرازيل ومنه الى طريق طرابلس وبعدين على شارع الكورنيش ومنه
الى شارع الغوطة
ولفوا من عند الرينبو ونزلوا بالغوطة هيك لحتى وصلوا لعند الصالة ()
ووقفت السيارات ونزلت العالم من السيارات وطلعت بعض النسوان اللي بالصالة لتتفرج على نزلة العروس
وشفوا على هالمناظر
شي بروس وشي بلا روس
ملاحظة( عنا بالاعراس بتصير شغلات مو حلوة منوب ومنها إنو في بعض المحجبات بيتقصدوا
بيشيلو الحجاب وبيطلعوا من دون حجاب على أساس إنو هيي ليلة بهالعمر وكل الناس فرحانة وما حدا بيدقق
على هالشي وهادا شي سيء ومرفوض )

ووقت نزل العروس والعريس عملولن النسوان زفة زلاغيط غير شكل
كان في واحد من رفقات فاروق معو فرد وكان نادر انو يقوس بعرس فاروق مشط رصاص
وفعلا طالع هالزلمي الفرد وقوس بالهوا مشط رصاص
وفات العريس هوي والعروس على الصالة ووراهن ماشي هالناس
وقف فاروق مذهول وتلبك من المنظر اللي شافو
الصالة مليانة ماشا الله والكل عم يطلعوا فيه فاستحا كتير الزلمي واحمر وجهوا وعرق وصار يقول بينو بين حالوا :
ولي .........لك في نس نسوان هون أد اللي كانوا بالخطبة على 3 مرات
حست سوزان بفاروق انو خجلان فمسكتوا من ايدوا ومشيوا ووصل فاروق عروستو محل ما بدها تقعد ورحب
بالعالم هنيك من قرايبينو من خالاتو عماتو وبنات عمو وبنات خالو وباركولوا وطلع فاروق فورا من الصالة
وما عرف شلون طلع من هالزحمة وهالعلقة
وهوي طالع من باب الصالة كان في ولد صغير عم ياكل موزة ورما قشرة الموزة عالارض
وفاروق طالع بسرعة ومانو منتبه فبدوس على قشرة الموزة وبروح سفق على ضهرو
انتبهت عليه وحدة من النسوان اللي كانت واقفة جنب الباب وقالتلو : الله الله يحميك .....
قوم خالي صرلك شي؟
فاروق: أأأأأخخخ لا مافي شي خالي ,...........شغلة بسيطة
ومشي فاروق لبرا هوي حاني ضهرو وركب بالسيارة ورجع هوي وجماعتو على بيت أهلو مشان يكفوا سهرة
العريس

( ولي على هالعريس المشحر )
فاتت هاي المرأة لجوا وقعدت جنب رفيقتها اللي جايين عالعرس سوا وقالتلا: لك حزري شو صار برا عالباب
رفيقتها: شو صار؟
المرأة : العريس وهوي طالع عالباب تزحلط بقشرة الموزة اللي كبها حمودي ابنك عالباب ووقع على ضهرو
خطي
رفيقتها: أماني؟.......هههههههههههه
المرأة : خطي وقام وتوسخت بدلتو وصارت كلها نشح
رفيقتها : أي أريضة هني كمان تبعوت الصالة ... ينضفوها منيح ......مانن عرفانين
في عرس اليوم؟
المرأة : أي وانتي كمان ضروري تعطي ابنك موزة ياكلها
رفيقتها: لك أي عم ينق عليي بدو ياكل قمت فتحت شنتايتي وعطيتو ياها
المرأة: يا مشحرة ...حاطة الموز معك بالشنتة ؟ ولي عليكي شو نورية
رفيقتها :يييي انتي كمان.......بني آدم بركي جعت وأنا بالعرس قلت لحالي بااكلها

الحقيقة يا جماعة هالعرس نهفة من النهفات شوفوا شلون النسوان بيحكوا بالأعراس

كانت الصالة فعلا مليانة
والمسجلة شغالة ومعلايين الصوت عالآخر
كات في وحدة ختيارة قاعدة وجنبها بنتها وبنت بنتها فقات الختيارة لبنتها:
ولك بنتي قولي لبنتك تقوم تعملها فتلة وترقصلا شوي بركي بيجي نصيبها بهالعرس
الأم : لا أمي اذا نصيبا بدو يجي بيجي لحالوا ...بدون فتلات........خليها قاعدة جنبي عم تتفرج
الختيارة: ولك يا هايشي خليها تقوم ترقصلا شوي ليكي هالبنات شلون عم يتفتلوا ويرقصوا ما أحلاهون
الأم : خليها قاعدة لحتى حدا يجي يقلها قومي رقصي وقتها بتقوم بترقص
الختيارةشافت وحدة من اللي عم يضيفوا قهوة بالعرس ونادتلا
الختيارة: شلونك خالي
البنت : الحمد لله خالي
الختيارة : بنت مين أنتي ولك خالي؟
البنت : أم عبدوبتكون عمتي وسوزان بنت عمتي
الختيارة : ييي والسبع تنعام منك يا أميرة .......ليش ماعم ترقصي خالي؟
البنت : والله رقصت لحتى تعبت فقلت لأستريح شوي قامت الماما عيطتلي مشان ضيف صينية القهوة
الختيارة: ليكي خالي هاي بنت بنتي هنادي وبدها ترقص بس خجلانة ....قوميها وروحوا ارقصوا
انتي وياها
البنت : تكرم عينك يا خالي ....بس لحتى خلص تضييف القهوة
وراحت البنت وخلصت تضييف القهوة ورجعت بدها تقومها لهنادي مشان يرقصوا: كيفك هنادي
هنادي: منيحة
البنت : قومي ارقصي ليش قاعدة؟
هنادي : لا لا ما بدي بستحي
الختيارة : قومي تيتي قومي عمليلك فتلة....مشاني
هنادي : بس مشانك تيتي
الختيارة: يي روحي يا تيتي الله يطول بعمري واحضر عرسك ويبعتلك ابن الحلال

وقامت هنادي ورقصت

وشافوها جماعة قاعدين بالعرس وعم يخطبوا لأبنون فعجبتون هنادي وصار بيناتون الحديث التالي:
الاولى: لك أختي........شايفة هالبنت اللي عم ترقص
الثانية: اينا وحدة منهون ولك أختي في كتير بنات عم ترقص
الاولى: لك ليكيها هديك أم الاحمر
الثانية: أي شفتها شبها؟
الاولى: ولك حلوة يا أختي .....يقبر قلبي مهند ابني هاد طلبوا .....قلي أمي بدي ياها زرزة
وطويلة وعينها كبار وحلوين وجسمها حلو
الثانية: أي والله ما شبها شي ............روحي سألي بنت مين هاي
وقامت الاولى وسألت وحدة من النسوان عن البنت فما حدا عرفها
ورجعت وقعدت جنب أختها وقالت لها: ولك أختي سألت ما حدا بيعرفها
الثانية : أي تركيها عليي أنا بعرفلك بنت مين
الثانية نادتلها للبنت وهيي عم ترقص: تعي خالي تعي شوي
واجت هنادي وقعدت جنب الثانية وقالت الثانية: شو أسمك خالي؟
هنادي: اسمي هنادي
الثانية : اللهم صلي عالنبي عاشت الاسامي يا خالي.....من بيت مين أنتي خالي؟
هنادي : أنا من بيت ....................
الثانية : وين ساكنين خالي؟
هنادي : بالخالدية
الثانية: عندكن تلفون خالي؟
هنادي : ليش بدك رقمنا خالي؟
الثانية: هههههههه والله ياخالي عم ندور على عروس لأبن أختي
هنادي :طيب استنى لأسأل الماما
وراحت هنادي وقالتلا لأمها شوصار معها وسمعت الختيارة الحديث وقالت لبنتها :
ها ....شفتي؟......هاي شافوها جماعة وعجبتون ....
أريضة ولك بنتي على طول بتضلي حوبي صار عندك شباب وصبايا ولسا بدي علمك
وقامت الام وسلمت عالجماعة وعطتون رقم التلفون

وكان في جماعة تانين بالعرس عم يتوشوا بين بعضون
الاولى: ليكي هالضرصانة شو لابسة
الثانية: مين هاي؟
الاولى: سهام ما عرفتيها؟
الثانية : مين سهام
الاولى : ولك سهام اللي اتطلقت من شي شهرين
الثانية: أي أي ولك عرفتا ....وليش حاضرة العرس الله يهمدها...ما خلصت العدة تبعتها لسا
الاولى: اينا عدة هاي ...ليش المتل هاي بيمسكوا عدة ؟...بعد ما اتطلقت بجمهة شفتها بالسوق
نازلة عم تتفتل
الثانية: يي الله يقرف عمرا
الاولى : ليش ما دريتي بقصتها
الثانية: لا والله
الاولى: هيي اللي طلبت الطلاق من جوزها وبعد ما اتطلقت زتتلو الولاد بخلقتوا لجوزا وقالتلو روح
ربيهون انتي وأهاليك
الثانية : يه يه يه الله يقصف عمرها...حدا بيترك ولادو هيك؟
الاولى: لكن أختي لكن ...بدها تروح تصيع وتفلت وتتمتع بشبابها
الثانية: وليش اتطلقوا ولك خيتو؟
الاولى: والله ما بعرف يا خيتو .....سمعت كتير حكي من هون وهون
جماعة قالوا حماتها كانت ورا شغلة الطلاق وجماعة قالوا انو جوزها داقت خلاقو منها لأنها مهملة
لبيتها وولادها وعهوا حكي الناس عندها ولد صغير اتكهرب بالغسالة وهيي قاعدة عم تطق حنك عالتلفون
وكان الولد رح يموت لولا لطف الله....وفي تاس قالت والله العليم انو ممشاها مانو نظيف والعياذ بالله
الثانية: ايييييه ولك يا أختي ..قال عيش كتير بتشوف كتير

واجت الضيافة وكانت الضيافة عبارة عن صحن فيه قطعتين كول وشكور وقطعة بللورية وقطعة بيتزا صغيرة
وقرص صفيحة مضفورة وقرص معمول بفستق حلبي (يعني الجماعة ع قدهن ما قدروا يعملوا بوفيه مفتوح)

وبلش الشلي واللت والعجن تبع النسوان

في جماعة قالوا: أريضة انشالله لشو هالبخل؟...يعملولن سفرة متل الخلق والعالم
وفي جماعة قالوا: ليش هيك هالحلو محنن ما بيتاكل؟ من وين جايبينو؟
وفي جماعة قالوا : يحطولن شي قطعة راحة تقيلة مع هالصحن
وفي جماعة قالوا: أي يكتروا هالضيافة شوي أي هدول ما بيشبعوا ولد صغير
وفي جماعة قالوا: شو هالعرس المشحر ...الضيافة مشحرة...مافي لا كاسة مي مع الاكل ولا في
مجمع محارم مشان الواحد يمسح ايديه بعد ما يخلص أكل

ووووووووووووووووووحكي النسوان هادا ما بيخلص

بهالوقت كان فاروق سهران ومبسوط مع أهليتو ورفقاتو والمطرب ابو مروان الطش عم يحيي السهرة ووقت
صارت الساعة 12 ونص قاموا الجماعة مشان يرجعوا عالصالة وياخدوا العروس على بيتها الجديد لأنو قرب
يخلص العرس
ونزلوا الجماعة ونزل معهون العريس وركبوا بالسيارات ومشوا الى الصالة

ولكن في شي ما بيطمن بانتظارهن

هادا يا جماعة الخير وقت وصل العروس هوي والعريس اول مرة عالصالة وطالع رفيقو لفاروق الفرد وقوس
مشط رصاص .
كان في دورية مخابرات مارة بالغوطة فسمعت صوت الرصاص جاي من صوب الصالة
فرجعوا عالصالة فوجدوا انو العريس كان رايح وسألوا الناطور تبع الصالة فقلن انو في واحد من
أهل العريس طالع فردوا وقوس
فصفت الدورية السيارة مقابيل الصالةوقعدوا يستنوا ليرجع العريس

ووصل فاروق عالصالة بآخر العرس وفات لجوا وفات معو ولاد عمو لعند الباب ووصلوه
وكان عالباب باستقبالوا العروس سوزان ببدلتها البيضا وطرحتها وباقة الورد بأيدها
كانوا هالروسين كتير مبسوطين وطاير عقلن ببعض
وفات فاروق عالصالة هوي وسوزان وزلغطتلوا أموا وخالتو أم أحمد ومرت عمو وكل النسوان
وقعد وقعدت سوزان وجابولوا فنجان قهوة
بعد ما شرب القهوة اجت أم فاروق وقومت سوزان مشان ترقص
وقامت سوزان وحطولا أغنية فارس كرم ( بقعد من دون شمس ومي بس ما بقعد بلاكي)
ورقصت سوزان وفتلت فتل وفاروق مبسوط وعم بصفق لعروستو
وخلصت الاغنية وحطوا أغنية ديانا حداد (قلبي حبك يالأسمر من يوم اللي كنت صغيرة )
واجت سوزان لعند فاروق وشدتوا من ايدوا مشان يقوم يرقص معها
وكان فاروق مانوا حاسب هالحساب واتلبك واحمر وجهوا
وقال لسوزان : خلص ما بدي ارقصي انتي لحالك
سوزان : لا بدك ترقص معي يالله قوم
وأجت أم فاروق وبناتا وقوموا العريس مشان يرقص
فشاف فاروق انو هادا شر لا بد منو فقام ورقص
وخطي هالفاروق ما بيعرف يرقص منيح
فصارت النسوان تضحك على فاروق شلون عم يرقص
وهرب فاروق وطالع سيكارة من الباكيت مشان يدخن وهوي عم يقول لحالوا :
الله يمضي هالعرس على خير

وبعد شي نص ساعة وقفت المسجلة وقامت النسوان لبست مشان يروحوا عبيوتن وقام فاروق هوي
وعروستو مشان يروحوا على بيتون
وطلعوا وطلع معو أمو وأخواتو وحماتو وبعض الاقارب
وعلى باب الصالة شافت دورية المخابرات العريس وهوي طالع فإجو ودقوا فيهوسألوه:
العنصر: أنت العريس
فاروق : أي نعم
العنصر : ما بتعرف انو القواس ممنوع بالاعراس؟
فاروق : ليش شوفي يا شباب؟
العنصر: في واحد قوس هون من شي ساعتين وسألنا وقالولنا انو القواس طلع من عندكن
فاروق اصفر لونو وقال: أي وشو يعني هلأ؟
العنصر : يعني بدك تتفضل وتشرف معنا عالفرع
فاروق اصفر لونو وسلت قلبو وماعاد يعرف شو يحكي
العنصر : يالله مشي.........خدوه
ام فاروق هيي شافت هالشوفي وبلشت تولول: لك وليييييييييييييييييي وين آخدينك يا بنيي
أم فاروق: شوفي يا خيو ؟ الله يوفقك يا خيو لا تاخدلي ابني الليلة عرسو يقبر قلبي
العنصر: ما بيصير .لازم ناخدوا . هيك عنا تعليمات
واجا ابن عمو لفاروق وبعض قرايبينو ورفقاتو ليشوفوا شو القصة
وكلمة من هون وكلمة من هون تنحوا الجماعة وقرروا يشحطوا فاروق عالفرع
الجيران طلعوا عالبرندات يتفرجوا شو صاير
سوزان وقت شافت هالشوفة صارت تبكي
يا حرام ما لحقت تتهنى بعريسها

شلون الجزء اليوم
وشلون هالعريس المشحر ههههههه
قال المنحوس منحوس
لا عمبمزح صحي هوي منحوس شوي بس حظه بسوزان بكفي

شلون لاتقنعوني

قصة حلوة وهي

نهاية رجل شجاع

يا حرام
شو هالنهاية
يسلم إيديك

رنيم كتب:: يا حرام
شو هالنهاية
يسلم إيديك

اي والله ياحرام

انشاء الله ما منشوفها

الله يسلمك

لك مني كل الحب والوفاء

ييي يا حرام ولي على هالحظ المشحر..
بس شو مشان ماقلتولنا أديش انحكم فاروق فارط ضحك

يعطيك العافيه فارس ..

لكا ياعمي ,,, هي المخابرات مو حيالله

حتى اني بذكر عنا بالضيعة صار في عرس ومسكت انا وكم واحد من الشباب هالفرودة وصرنا نقوّس

ومافي ربع ساعة ولا الشرطة جاية , وياليت ضبت فينا

ضبت بالعريس يااحرام

خخخخخخ

اقتباس :: لكا ياعمي ,,, هي المخابرات مو حيالله

مع إنو في عراس بيصير فيا قواس وما حدي بيقرب وبيحكي